سعودی عرب،ہوٹل بکنگ میں پہلی ششماہی کے دوران مدینہ منورہ سرِفہرست رہا

ہفتہ 4 اکتوبر 2025 10:20

ریاض (اُردو پوائنٹ اخبارتازہ ترین - اے پی پی۔ 04 اکتوبر2025ء) ہوٹل بکنگ میں رواں سال کی پہلی ششماہی میں مدینہ منورہ دیگر شہروں کے مقابلے میں سرِفہرست رہا ۔ اردو نیوز نے سعودی وزارتِ سیاحت کی رپورٹ کے حوالے سے بتایا ہے کہ رواںسال کی پہلی ششماہی میں مدینہ منورہ کے ہوٹلوں اور فرنشڈ اپارٹمنٹس کی بکنگ کا گراف مملکت کے دیگر شہروں کے مقابلے میں سرفہرست رہا ۔

(جاری ہے)

رپورٹ میں کہا گیا ہے کہ مدینہ منورہ میں رجسٹرڈ ہوٹلوں کی تعداد 538 ہے جن میں نئے تعمیر شدہ 69 رہائشی ہوٹل بھی شامل ہیں۔ مدینہ منورہ کے ہوٹلوں اور فرنشنڈ اپارٹمنٹس میں کمروں کی مجموعی تعداد 64 ہزار 569 ہے جبکہ نئے تعمیر ہونے والے ہوٹلوں کے 6 ہزار 628 کمرے بھی شامل ہیں۔ مدینہ منورہ میں جاری عالمی سطح کا سب سے بڑا ہوٹلنگ رہائشی منصوبہ’’رؤی المدینہ‘‘ پر بھی تیزی سے تعمیراتی کام جاری ہے جس کا مقصد سالانہ بنیاد پر لاکھوں زائرین کو بہترین اور معیاری رہائشی سہولیات فراہم کرنا ہے۔