کراچی: گلبہار میں ڈاکووں نے جیولری شاپ کو لوٹ لیا

ملزمان بھاری مالیت کے چاندی و سونے کے سیٹ، قیمتی پتھر اور نقدی لوٹ کر فرار ہوگئے، مقدمہ درج

ہفتہ 4 اکتوبر 2025 16:04

کراچی(اُردو پوائنٹ اخبارتازہ ترین - این این آئی۔ 04 اکتوبر2025ء)گلبہار کے علاقے گولیمار فردوس مارکیٹ میں ڈاکووں نے چاندی و نگینہ شاپ کو لوٹ لیا۔مسلح ڈاکوئوں نے دکاندار کو یرغمال بنا کر تشدد کا نشانہ بنایا اور اسلحے کے زور پر دکان سے بھاری مالیت کے چاندی و سونے کے سیٹ، قیمتی پتھر اور نقدی لوٹ کر فرار ہوگئے۔گلبہار پولیس نے واردات کا مقدمہ نمبر 203 سال 2025 بجرم دفعات 395 اور 337 اے ون کے تحت دکاندار کی مدعیت میں درج کرلیا۔

(جاری ہے)

مدعی کے مطابق اسلحہ بردار 4 ڈاکو میری دکان میں آئے اور مجھے یرغمال بنا کر اسلحے کے زور پر 300 چاندی کی انگوٹھیاں، بڑی تعداد میں قیمتی پتھر، نگینے، 2 سونے کے سیٹ، 35 ہزار روپے نقد اور موبائل فونز چھین کر فرار ہوگئے، ڈاکووں نے مجھے تشدد کا نشانہ بھی بنایا۔ایس ایچ او گلبہار ہدایت حسین نے بتایا کہ واردات جمعہ کی شام ہوئی تھی جس کا مقدمہ درج کرکے مزید تفتیش کے لیے انویسٹی گیشن پولیس کے حوالے کردیا ہے۔