اسلام آباد ضلعی انتظامیہ نے ڈینگی ایس او پیز پر عمل درآمد نہ کرنے پر 31 افراد کو گرفتار کر لیا

اتوار 5 اکتوبر 2025 12:10

اسلام آباد (اُردو پوائنٹ اخبارتازہ ترین - اے پی پی۔ 05 اکتوبر2025ء) اسلام آباد کی ضلعی انتظامیہ نے ڈینگی ایس او پیز پر عمل درآمد نہ کرنے پر مجموعی طور پر 31 افراد گرفتار کر لئے۔

(جاری ہے)

اتوار کو ضلعی انتظامیہ کی جانب سے جاری بیان کے مطابق انسداد ڈینگی فوگنگ کے لیے 15 نئی فوگنگ مشینیں فعال ہوگئی ہیں، وفاقی دارالحکومت میں ڈینگی کے خلاف بڑے پیمانے پر فوگنگ کا آغاز کر دیا گیا ہے، ضلعی انتظامیہ کی جانب سے تمام ہاٹ سپاٹس پر انسداد ڈینگی فوگنگ جاری ہے، گزشتہ چوبیس گھنٹوں کے دوران مجموعی طور پر 1 ہزار 975 جگہوں پر فوگنگ کی گئی ، مثبت ڈینگی کیسز رپورٹ ہونے والے تمام علاقوں میں بھی فوگنگ مکمل کی گئی ہے۔

انتظامیہ نے ڈینگی ایس او پیز پر عمل درآمد نہ کرنے پر مجموعی طور پر 31 افراد گرفتار کئے ہیں ، ڈپٹی کمشنر اسلام آباد عرفان نواز میمن نے فوگنگ ٹیم کو یومیہ شفٹ ڈبل کرنے کی ہدایت کی ہے۔ انہوں نے کہا کہ شہر بھر میں کوئی بھی علاقہ باقی نہ رہے جہاں فوگنگ نہ کی جا سکے، اسسٹنٹ کمشنرز ڈینگی لاروا افزائش کی وجہ بننے والے عناصر کے خلاف کاروائیاں تیز کریں۔ انہوں نے شہریوں سے انسداد ڈینگی ایس او پیز پر عمل درآمد کی پر زور اپیل کی۔