کبری نے شادی کی پہلی پیشکش ٹھکرا دی تھی، گوہررشید کا انکشاف

پیر 6 اکتوبر 2025 18:42

کراچی (اُردو پوائنٹ اخبارتازہ ترین - این این آئی۔ 06 اکتوبر2025ء) اداکار گوہر رشید نے انکشاف کیا ہے کہ جب پہلی بار اہلیہ کبری خان کو شادی کی پیشکش کی تھی تو انہوں نے انکار کر دیا تھا۔ویب شو کو انٹرویو میں گوہررشید نے کہا کہ میرے خیال میں انسان کو شادی اس وقت کرنی چاہیے جب اس کا دل تمام دنیاوی خواہشات سے بھر جائے کیونکہ شادی ایک بہت بڑی ذمہ داری ہے اور اس رشتے کو انسان کی پوری توجہ کی ضرورت ہوتی ہے۔

اداکار نے کہا کہ میں والدین کو بھی ایک مشورہ دوں گا کہ جس طرح وہ اپنی اولاد کو باقی دنیاوی چیزوں جیسے تعلیم، نوکری اور اخلاقیات کے بارے میں سمجھاتے ہیں بالکل اسی طرح خاص طور پر بیٹوں کی تربیت کرتے ہوئے انہیں شادی کی ذمہ داریوں کے بارے میں بتا کر پہلے سے تیار کریں۔

(جاری ہے)

انہوں نے بتایا کہ ہمارے معاشرے کا المیہ یہ ہے کہ ہمیں شادی کے بارے میں صرف یہ بتایا جاتا ہے کہ آپ کو نکاح نامے پر دستخط کرنے ہیں لیکن شادی کے بعد کتنی ذمہ داریاں آئیں گی یا شادی کے بعد انسان کا رویہ کس طرح کا ہونا چاہیے، یہ نہیں بتایا جاتا۔

گوہر رشید نے کہا کہ اب میری شادی ہوئی تو میری زندگی میں بہت ساری تبدیلیاں آئی ہیں اسی طرح کبری کی زندگی میں بھی بہت تبدیلی آئی ہے۔انہوں نے کہا کہ شادی کے بارے میں یہ عام خیال بھی بالکل غلط ہے کہ شادی جلدی کر لینی چاہیے، شادی کسی عمر میں ہوتی ہے اس سے کوئی فرق نہیں پڑتا، میں نے 40سال کی عمر میں شادی کی ہے، اب میں زیادہ سمجھدار ہوں اور اب مجھے اس بات کی زیادہ سمجھ ہے کہ کسی جھگڑے کے دوران سامنے والے کے نظریے کو بھی سمجھنا ہے۔

اداکار نے کہا کہ اب ضروری نہیں کہ ہر انسان عمر بڑھنے کے ساتھ ہی سمجھدار ہو بلکہ سمجھداری کا تعلق تجربے سے ہے، کچھ لوگ 30سال کی عمر میں ہی 40سال کے انسان جتنے سمجھدار ہوتے ہیں تو جب انسان سمجھدار ہوجائے تب شادی کر لے۔انہوں نے انکشاف کیا کہ مجھے پہلے کبری سے محبت ہوئی اور میں نے ہی پہلے شادی کی پیشکش کی تھی جوکہ ٹھکرا دی گئی تھی لیکن میں نے ہار نہیں مانی اور کوشش کرتا رہا پھر جب دوسری بار شادی کی پیشکش کی تو قبول ہوگئی۔گوہر رشید نے ہنستے ہوئے کہا کہ کبری کا پہلی بار شادی کی پیشکش سے انکار کرنا بنتا بھی ہے کیونکہ جہاں حسن ہو وہاں نزاکت تو ہوتی ہے۔انہوں نے کہا کہ کبری کے زندگی میں آنے کے بعد میں ایک بہتر انسان بن گیا ہوں۔