محکمہ ماہی پروری کی کسی بھی جگہ پر فش فارم بنانے سے قبل زمینی مٹی اور پانی کا تجزیہ کروانے کی ہدایت

بدھ 8 اکتوبر 2025 13:46

فیصل آباد (اُردو پوائنٹ اخبارتازہ ترین - اے پی پی۔ 08 اکتوبر2025ء) محکمہ ماہی پروری نے مچھلی پال حضرات کو کسی بھی جگہ پر فش فارم بنانے سے قبل زمینی مٹی اور پانی کا تجزیہ کروانے کی ہدایت کی ہے اورفیصل آباد کے کچھ علاقوں کو پانی میں نمکیات کی مقدار زیادہ ہونے کے باعث مچھلی فارمز بنانے کیلئے غیر موزوں قرار دیاہے جبکہ مختلف مقامات پر مچھلی فارمز قائم کرنے کیلئے حاصل کردہ مٹی و پانی کے اکثرسیمپلز کی چیکنگ کے بعدفیصل آباد میں جھنگ برانچ سے ملحقہ علاقہ جات، سمندری، تاندلیانوالہ، جڑانوالہ کے علاقوں کو مچھلی فارم بنانے کیلئے موزوں قرار دیاگیاہے۔

(جاری ہے)

محکمہ ماہی پروری فیصل آباد ریجن کے ترجمان نے بتایاکہ پانی میں نمکیات کی مقدار زیادہ ہونے کی وجہ سے جہاں مچھلیاں بہتر طریقے سے اپنی افزائش نسل جاری نہ رکھ سکتی ہیں وہیں بڑی تعداد میں مچھلیوں کے مرنے کے خدشات بھی موجود رہتے ہیں جس سے فش فارمرز کو مالی نقصان کا سامنا کرناپڑتاہے۔ انہوں نے عوام الناس سے اپیل کی کہ وہ کسی بھی جگہ پر فش فارم بنانے سے قبل زمینی مٹی اور پانی کا تجزیہ ضرور کروا لیں تاکہ بعد ازاں انہیں کسی پریشانی کا سامنا نہ کرنا پڑے۔