پشاور، گندم سکینڈل کیس میں 5ملزمان پر فرد جرم عائد

ملزمان نے ملی بھگت سے 1700 ٹن گندم غائب کی، پراسیکیوشن

بدھ 8 اکتوبر 2025 22:05

پشاور (اُردو پوائنٹ اخبارتازہ ترین - این این آئی۔ 08 اکتوبر2025ء) خیبر پختونخوا کی اینٹی کرپشن عدالت نے گندم اسکینڈل کیس میں نامزد 5 ملزمان پر فرد جرم عائد کر دی۔بدھ کو کیس کی سماعت اینٹی کرپشن کورٹ خیبر پختونخوا کے جج آصف رشید نے کی۔ ملزمان محمد ارشد، محمد خالد، قاضی جنید، طلا محمد اور محمد عاطف عدالت میں پیش ہوئے۔

(جاری ہے)

پراسیکیوشن نے عدالت کو بتایا کہ ملزم عثمان عابد شاہ تاحال روپوش ہیں، ملزمان اضاخیل نوشہرہ کے گندم اسٹوریج گودام میں ملازم تھے جنہوں نے ملی بھگت سے 1700ٹن گندم غائب کی۔

پراسیکیوشن کے مطابق ملزمان نے قومی خزانے کو 20کروڑ روپے کا نقصان پہنچایا ہے، ملزمان کے خلاف تحقیقات مکمل ہونے کے بعد چالان عدالت میں پیش کیا گیا۔عدالت نے ملزمان پر فرد جرم عائد کرتے ہوئی20اکتوبر کو گواہوں کو طلب کرلیا۔