مملکت کے بعض علاقوں میں لیتھیم کی موجودگی کے آثار پائے گئے ہیں،سعودی وزیر

پیر 13 اکتوبر 2025 10:50

جدہ (اُردو پوائنٹ اخبارتازہ ترین - اے پی پی۔ 13 اکتوبر2025ء) سعودی عرب کے وزیر برائے صعنت و معدنی وسائل بندر الخریف نے کہا ہے کہ مملکت کے بعض علاقوں میں لیتھیم کی موجودگی کے آثار پائے گئے ہیں۔اخبار 24 کے مطابق انہوں نے یہ بات جدہ میں سعودی جیولوجیکل سروے اتھارٹی کے زیر اہتمام سیمینار کے موقع پر صحافیوں سے گفتگو کے دوران کہی۔ انہوں نے کہا کہ لیتھیم کو نکالنے اور صاف کرنے کے حوالے سے مخصوص کمپنیاں کنگ عبداللہ سائنس و ٹیکنالوجی یونیورسٹی ’کاوسٹ‘ کے اشتراک سے جدید طریقوں پر تحقیق کررہی ہیں۔

بندر الخریف کا کہنا تھا کہ مملکت کان کنی کے حوالے سے عالمی سطح پر بھی اہمیت اختیار کرچکی ہے ، اس شعبے کے حوالے سے مملکت میں ہی نہیں بلکہ عالمی سطح پر بھی اہم اقدامات کیے ہیں۔

(جاری ہے)

قبل ازیں کانفرنس سے خطاب کرتے ہوئے انہوں نے کہا کان کنی سے متعلق کانفرنس اب عالمی سطح پر غیرمعمولی پلیٹ فارم بن چکی ہے جہاں حکومتوں، کمپنیوں اور اس شعبے کے سرمایہ کاروں کے ساتھ مختلف امور پر تبادلہ خیال کیا جاتا ہے۔انہوں کہا کہ مملکت کے معدنی ذخائر میں 2024 کے دوران 90 فیصد اضافہ ہوا ۔ ان کا کہنا تھا کہ سعودی عرب اب جدید ترین کان کنی ٹیکنا لوجی کی ٹیسٹنگ اور نفاذ کی ایک بڑی منزل بن چکا جس میں دریافت اور پیداوار میں جدید ڈیجیٹل حل اور مصنوعی ذہانت کا استعمال شامل ہے۔