فیصل آباد،کاشتکاروں کو زیادہ پیداوار کی حامل مکئی کی اقسام کاشت کرنے کی ہدایت

جمعرات 16 اکتوبر 2025 12:59

فیصل آباد (اُردو پوائنٹ اخبارتازہ ترین - اے پی پی۔ 16 اکتوبر2025ء) محکمہ زراعت نے کاشتکاروں کو زیادہ پیداوار کی حامل مکئی کی اقسام کاشت کرنے کی ہدایت کی ہے۔ ترجمان نظامت زرعی اطلاعات محکمہ زراعت توسیع فیصل آباد نے کہا ہے کہ پولٹری انڈسٹری سالانہ 9فیصد شرح نمو کے ساتھ اپنا دائرہ بڑھا رہی ہے اور اسی شرح سے پولٹری فیڈکی ضروریات میں بھی اضافہ ہورہا ہے لہٰذا کاشتکارزیادہ پیداواری امکانات کی حامل مکئی کی اقسام کاشت کرکے اپنے مالی وسائل میں اضافہ کرسکتے ہیں۔

انہوں نے کہا کہ مکئی کی مقامی دوغلی اقسام کی تیاری کے حوالے سے مقامی زرعی تحقیقاتی ادارہ اہم کردار ادا کررہا ہے۔انہوں نے کہا کہ ایف ایچ 810، ایف ایچ 421،ایف ایچ 985، ایف ایچ 949،ایف ایچ 793اور ایف ایچ 1046وغیرہ زیادہ درجہ حرارت اور گرمی برداشت کرنے کی صلاحیت رکھتی ہیں جبکہ ان اقسام کی چھلیاں 8سے10انچ لمبی ہوتی ہیں اور ان چھلیوں پر دانوں کی 16سے18قطاریں موجود ہونے کی وجہ سے پیداواری صلاحیت 100سے110من فی ایکڑ ہے۔

(جاری ہے)

انہوں نے بتایاکہ پنجاب کے چھوٹے کاشتکار ادارے کی تیار کردہ مقامی دوغلی اقسام کا بیج سستا ہونے کی وجہ سے کاشت کو ترجیح دیتے ہیں۔انہوں نے بتایا کہ ہمارے زرعی سائنسدان سنگل کراس کے ساتھ ڈبل کراس ہائی برڈ لائنوں پر بھی کام کررہے ہیں اور مستقبل میں مکئی کی ایسی نئی اقسام متعارف کرائیں گے جوبدلتے ہوئے موسمی حالات اور پانی کی کمی جیسی صورت حال کا مقابلہ کرنے کی صلاحیت رکھتی ہوں۔