پاکستان بین الاقوامی سماع فیسٹیول مصر میں بطور مہمان اعزاز شریک ہوگا

پیر 24 نومبر 2025 21:20

قاہرہ (اُردو پوائنٹ اخبارتازہ ترین - اے پی پی۔ 24 نومبر2025ء) پاکستان اس سال مصر اور دنیا بھر کے اہم ثقافتی و فنون لطیفہ تقریبات میں سے ایک بین الاقوامی سماع فیسٹیول برائے روحانی موسیقی کے اٹھارہویں ایڈیشن میں بطور مہمان اعزاز کے طور پر شرکت کرے گا، فیسٹیول کا انعقاد 27 سے 30 نومبر 2025ء تک ہوگا۔ مصر میں پاکستانی سفارتخانے سے جاری بیان کے مطابق پاکستان کی نمائندگی کے لیے "بدر علی و بہادر علی قوال گروپ" کو اس تقریب میں شرکت کے لیے مدعو کیا گیا ہے۔

یہ فیسٹیول مذہبی اور روحانی موسیقی میں منفرد، تخلیقی اور انفرادی صلاحیت کے 18 سال پورے ہونے کی علامت ہے۔ افتتاحی تقریب جمعرات (27 نومبر کو) شام 8 بجے الغزہ میں واقع السمر تھیٹر (قومی سرکس اور برٹش کونسل کے قریب) میں منعقد ہوگی جس میں تمام مصری اور بین الاقوامی گروپس اپنے فن کا مظاہرہ کریں گے۔

(جاری ہے)

اس سال کا پروگرام انتہائی متنوع و ممتاز ہے جس میں "بین المذاہب مکالمہ" کی گیارہویں تقریب بھی شامل ہے جس کا موضوع "یہاں ہم اکٹھے عبادت کرتے ہیں" ہے۔

اس کے علاوہ شرکا کے مصری اور بین الاقوامی گروپس بھی اپنی نمایاں قوالیاں پیش کریں گے۔یہ فیسٹیول دنیا بھر کے فنون و ثقافتوں کا ایک اہم ترین اجتماع ہوگا جس کا مقصد مختلف ممالک کے نئے فنون و ثقافتوں کو دریافت کرنا، لوگوں کے درمیان انسانی رابطے کو فروغ دینا اور مصر کے منفرد تشخص کو اجاگر کرنا ہے۔ فیسٹیول کا انعقاد "ایک پیغام امن کا" کے عنوان سے مصر کی جانب سے دنیا کے نام کیا جا رہا ہے۔ اسے مصر کے وزیر اعظم کی سرپرستی میں وزارت ثقافت، وزارت سیاحت و آثار قدیمہ (مصری جنرل اتھارٹی برائے فروغ سیاحت) اور ڈائیلاگ فائونڈیشن برائے فنون و ثقافت اقوام کے تعاون سے منعقد کیا جا رہا ہے۔