ہری پور کی ترقی اور عوامی مسائل کا حل مسلم لیگ (ن) حکومت کی اولین ترجیح ہے،ایم این اے بابر نواز خان

جمعرات 11 دسمبر 2025 19:20

ہری پور (اُردو پوائنٹ اخبارتازہ ترین - اے پی پی۔ 11 دسمبر2025ء) قومی اسمبلی کے حلقہ این اے 18 سے مسلم لیگ (ن) کے رکن قومی اسمبلی بابر نواز خان نے کہا ہے کہ ہری پور کی ترقی اور عوامی مسائل کا حل مسلم لیگ (ن) حکومت کی اولین ترجیح ہے۔موجودہ حکومت اپر خان پور کی یونین کونسلوں کے مسائل کے دیرپا حل کے لیے سنجیدہ اقدامات کر رہی ہے۔

(جاری ہے)

آئندہ بجٹ میں ان علاقوں کے لیے خصوصی ترقیاتی فنڈز مختص کیے جائیں گے اور جن منصوبوں پر کام جاری ہے انہیں مقررہ مدت میں مکمل کرایا جائے گا،وہ اپر خان پور کی یونین کونسل برکوٹ، مسلم آباد اور جبری میں جاری اور مجوزہ ترقیاتی منصوبوں کے حوالے سے منعقدہ ایک اہم مشاورتی اجلاس سے خطاب کر رہے تھے۔

اجلاس میں سابق ڈپٹی سپیکر قومی اسمبلی اور مسلم لیگ (ن) خیبرپختونخوا کے جنرل سیکرٹری مرتضیٰ جاوید عباسی اور تحصیل چیئرمین خان پور راجہ ہارون سکندر بھی شریک تھے۔مرتضیٰ جاوید عباسی نے اس موقع پر کہا کہ مسلم لیگ (ن) نے ہمیشہ عوامی خدمت کی سیاست کی ہے اور ہری پور کے عوام نے بارہا اس کا اعتراف اپنے ووٹ سے کیا ہے۔