پنجاب میں کاؤنٹر ٹیررازم ڈیپارٹمنٹ کے دائرہ اختیار میں اضافہ

لاہور (اُردو پوائنٹ اخبارتازہ ترین۔ 17 دسمبر2025ء) پنجاب حکومت کی جانب سے کاؤنٹر ٹیررازم ڈیپارٹمنٹ کے دائرہ اختیار میں اضافہ کر دیا گیا۔ تفصیلات کے مطابق صوبائی کابینہ کی منظوری سے سی ٹی ڈی کے دائرہ اختیار میں توسیع کی گئی ہے، جس کے تحت تحصیل کوہِ سلیمان، ڈیرہ غازی خان کو سی ٹی ڈی کے دائرہ اختیار میں شامل کرلیا گیا، تحصیل (ڈی ایکسکلوڈڈ ایریا) راجن پور بھی سی ٹی ڈی ڈیرہ غازی خان کے دائرہ اختیار میں شامل ہوچکا ہے۔

بتایا گیا ہے کہ سی ٹی ڈی ڈیرہ غازی خان کا دائرہ اختیار اب ڈی جی خان پولیس ریجن کے تمام اضلاع پر محیط ہوگا، ڈی جی خان پولیس ریجن میں ڈیرہ غازی خان، مظفرگڑھ، لیہ اور راجن پور شامل ہیں، حالیہ فیصلے کے تحت 27 ستمبر 2019ء کے سابقہ نوٹی فکیشن میں ترمیم کردی گئی، محکمہ داخلہ کی سفارش اور کابینہ کی منظوری سے نوٹی فکیشن بھی جاری کر دیا گیا۔

(جاری ہے)

دوسری طرف انسپکٹر جنرل پولیس پنجاب ڈاکٹر عثمان انور کی زیر صدارت سنٹرل پولیس آفس لاہور میں اہم اجلاس منعقد ہوا جس میں سپیشل انیشئیٹو پولیس سٹیشنز اور خدمت مراکز کی مجموعی کارکردگی، دیکھ بھال اور طے شدہ پروٹوکولز پر عملدرآمد کا تفصیلی جائزہ لیا گیا، اجلاس میں ڈی آئی جی آر اینڈ ڈی فواد الدین ریاض، اے آئی جی کمپلینٹس احمد محی الدین موجود تھے جبکہ آر پی او شیخوپورہ ڈی آئی جی اطہر اسماعیل امجد اور ڈپٹی کمانڈنٹ پی سی سید محمد امین بخاری نے بذریعہ ویڈیو لنک شرکت کی، آئی جی پنجاب نے شیخوپورہ، قصور اور ننکانہ صاحب کے پولیس سٹیشنز اور خدمت مراکز میں مینٹینس، صفائی ستھرائی اور ساز و سامان کی بہتر دیکھ بھال یقینی بنانے کی ہدایت کی۔

انہوں نے کہا کہ پولیس سٹیشنز اور خدمت مراکز میں آئی ٹی سسٹمز مکمل طور پر فنکشنل ہوں، عملے کی بائیومیٹرک حاضری یقینی بنائی جائے اور ریکارڈ کو محفوظ رکھا جائے، تمام ایس ایچ اوز کو ہدایت کی جاتی ہے کہ وہ روزانہ دوپہر 3 بجے سے 5 بجے تک لازمی طور پر تھانوں میں موجود رہیں اور شہری سائلین کے مسائل سن کر ان کا بروقت حل یقینی بنائیں، اجلاس میں ٹریفک لائسنسنگ اینڈ ڈرائیونگ سنٹرز میں شہریوں کے لیے سہولیات مزید بہتر بنانے پر بھی زور دیا گیا، آئی جی پنجاب نے ہدایت کی کہ شہریوں کو ترمیم شدہ ٹریفک قوانین سے آگاہی فراہم کرنے کے لیے مہم میں تیزی لائی جائے تاکہ قوانین پر عملدرآمد کو مثر بنایا جا سکے۔