ترکیہ میں تیار دوسرے پی این ایس خیبر کی پاک بحریہ میں شمولیت

راولپنڈی (اُردو پوائنٹ اخبارتازہ ترین۔ 21 دسمبر2025ء) پاک بحریہ میں دوسرے پی این ایس خیبر جہاز کی شمولیت ہوئی ہے، اس حوالے سے استنبول میں منعقدہ پروقار تقریب کے ترک صدر مہمان خصوصی تھے۔ مسلح افواج کے شعبہ تعلقات عامہ ( آئی ایس پی آر ) کے مطابق پاکستان نیوی کے ملجم کلاس کے دوسرے جہاز پی این ایس خیبر کی کمیشننگ کی تقریب استنبول نیول شپ یارڈ ترکیہ میں منعقد ہوئی، جمہوریہ ترکی کے صدر رجب طیب ایردوان نے اس موقع پر بطور مہمان خصوصی شرکت کی، تقریب میں پاک بحریہ کے سربراہ ایڈمرل نوید اشرف نے بھی شرکت کی، اس موقع پر خطاب کرتے ہوئے صدر رجب طیب ایردوان نے پاکستان اور ترکیہ کے درمیان برادرانہ تعلقات کو مثالی قرار دیا، ترک صدر نے مستقبل میں بھی دفاعی پیداوار کے شعبے میں باہمی تعاون کو بڑھانے کی ضرورت پر زور دیا۔

(جاری ہے)

انہوں نے کہا کہ مکمل کامیاب آزمائشوں کے بعد جدید جنگی جہاز پی این ایس خیبر پاکستان بحریہ کے حوالے کیا جا رہا ہے،پاکستان بحریہ کی ضروریات کو پورا کرنے کے لیے چار ملجم بحری جہازوں کی تعمیر کا معاہدہ کیا گیا تھا جس پر کامیابی سے عمل کیا جا رہا ہے، پاکستان ترکیہ کا سچا اور کھرا اتحادی ہے، دونوں ممالک کے درمیان دوستی قیامت تک قائم رہے گی، پاک ترک تعلقات وقت کے ساتھ مزید مضبوط اور مستحکم ہوں گے۔

بتایا گیا ہے کہ چیف آف دی نیول سٹاف ایڈمرل نوید اشرف نے اپنے خطاب میں میسرز ASFAT، استنبول نیول شپ یارڈ اور پی این ایس ملجم جہازوں کی منصوبہ بندی، ڈیزائن اور تعمیر میں شامل OEMs (اصل ساز و سامان تیار کرنے والے) کے عزم کا اعتراف کیا، نیول چیف نے پاکستان اور ترکیی کے درمیان مضبوط ہوتی ہوئی دفاعی شراکت داری کو بھی سراہا، انہوں نے اس بات پر روشنی ڈالی کہ پاک بحریہ اور ترک بحری افواج کے درمیان دوطرفہ مصروفیات نہ صرف پاک ترک دفاعی تعاون کو مضبوط بنانے میں اہم کردار ادا کرتی ہیں بلکہ ہماری دیرپا اور گہرے شراکت داری کی بھی عکاسی کرتی ہیں۔

معلوم ہوا ہے کہ تقریب کے بعد ترک صدر نے جہاز کا دورہ کیا جہاں انہیں گارڈ آف آنر پیش کیا گیا اور جہاز کے عملے سے بات چیت کی، دورے کے دوران ترک صدر اور چیف آف دی نیول سٹاف ایڈمرل نوید اشرف نے خطے میں میری ٹائم سکیورٹی کے حوالے سے تبادلہ خیال کیا اور مستقبل میں PN-TNF مشترکہ اقدامات کے مواقع پر تبادلہ خیال کیا۔ بتایا جارہا ہے کہ پی این ایس ملجم جہاز سب سے زیادہ تکنیکی طور پر جدید سطح کے پلیٹ فارم ہیں، یہ جہاز جدید ترین کمانڈ اینڈ کنٹرول سسٹمز سے لیس ہیں جو جدید ہتھیاروں اور جدید سینسرز سے لیس ہیں، پاکستان کے لیے ملجم کلاس کے 4 جہازوں کی تعمیر کا معاہدہ وزارت دفاعی پیداوار پاکستان اور ترکیہ کے درمیان 2018ء میں ہوا تھا، جس میں دو جہاز ترکیہ میں اور باقی دو جہاز پاکستان میں تعمیر کرنے کا منصوبہ تھا، پی این ایس خیبر کے شروع ہونے سے ترکیہ میں دونوں بحری جہازوں کی تعمیر مکمل ہوگئی۔