لاہوردنیا کے آلودہ ترین شہروں میں سر فہرست شامل ہوگیا

جمعہ 26 دسمبر 2025 20:17

لاہور(اُردو پوائنٹ اخبارتازہ ترین - آن لائن۔ 26 دسمبر2025ء) لاہور ایک بار پھر فضائی آلودگی کے حوالے سے خبروں کی زینت بن گیا ہے۔ کم ہوا کی رفتار اور درجہ حرارت میں کمی کے باعث شہر میں فضائی آلودگی میں مسلسل اضافہ دیکھا جا رہا ہے۔حالیہ رپورٹ کے مطابق لاہور دنیا کے آلودہ ترین شہروں میں پہلے نمبر پر آ گیا ہے، جہاں مجموعی فضائی آلودگی کی شرح 318 ریکارڈ کی گئی ہے۔

(جاری ہے)

شہر کے مختلف علاقوں میں آلودگی کی شرح اس طرح ریکارڈ کی گئی: سول سیکرٹریٹ 539، گلبرگ ٹو 499، کینٹ 353، اقبال ٹاؤن 344، برکی روڈ 339، بیدیاں روڈ 258 اور عسکری ٹین 252۔محکمہ موسمیات نے آگاہ کیا ہے کہ شہر میں آنے والے دنوں میں بارش کا کوئی امکان نہیں ہے اور موسم خشک رہنے کا امکان ہے، جس کے سبب فضائی آلودگی برقرار رہ سکتی ہے۔ شہریوں کو صحت کے لیے ضروری احتیاطی تدابیر اختیار کرنے کی ہدایت کی گئی ہے، خاص طور پر بچوں، بوڑھوں اور سانس کے امراض میں مبتلا افراد کے لیے ماسک کا استعمال ضروری قرار دیا گیا ہے۔