ملاوٹ شدہ زرعی ادویات کی فروخت میں ملوث عناصر کیخلاف سخت کارروائی ضروری ہے، شاہد عمران

اتوار 28 دسمبر 2025 17:40

لاہور (اُردو پوائنٹ اخبارتازہ ترین - اے پی پی۔ 28 دسمبر2025ء) فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کی ریجنل کمیٹی برائے خوراک کے کنوینئر شاہد عمران نے جعلی اور ملاوٹ شدہ زرعی ادویات کی فروخت میں ملوث عناصر کے خلاف فوری اور سخت کارروائی کا مطالبہ کیا ہے۔ اتوار کو لاہور میں کسانوں کے ایک وفد سے گفتگو کرتے ہوئے شاہد عمران نے کہا کہ غیر معیاری پیسٹی سائیڈز کی کھلے عام فروخت کسانوں کو شدید مالی نقصان پہنچا رہی ہے، کسان بہتر پیداوار کی امید میں اپنی جمع پونجی خرچ کرتے ہیں، مگر ملاوٹ شدہ زرعی ادویات کے استعمال سے فصلیں متاثر ہوتی ہیں، پیداوار کم اور کسان قرضوں کے بوجھ تلے دب جاتے ہیں۔

انہوں نے کہا کہ جعلی زرعی کیمیکلز کی وجہ سے نہ صرف کسانوں کا اعتماد مجروح ہو رہا ہے بلکہ کم معیار کی زرعی پیداوار عالمی منڈیوں میں پاکستان کی برآمدات کو بھی نقصان پہنچا رہی ہے جو ملکی معیشت کے لیے تشویشناک امر ہے۔

(جاری ہے)

شاہد عمران نے زور دیا کہ اس سنگین مسئلے کے حل کے لیے محکمہ زراعت، پیسٹی سائیڈ ریگولیٹری اداروں اور قانون نافذ کرنے والے اداروں کے درمیان موثر رابطہ اور ہم آہنگی ناگزیر ہے۔ انہوں نے کسانوں کے لیے آگاہی مہم شروع کرنے کی ضرورت پر بھی زور دیا تاکہ کاشتکار اصلی اور معیاری زرعی ادویات کی شناخت کر سکیں۔ انہوں نے کہا کہ کسانوں کا تحفظ، زرعی شعبے کی بہتری اور قومی غذائی تحفظ کو یقینی بنانا پائیدار معاشی ترقی کے لیے انتہائی ضروری ہے۔