بہترین پیداوار کے حصول کیلئے کاشتکاربہاریہ مکئی کی ترقی دادہ سنتھیٹک اور ہائبرڈ اقسام کاشت کریں، محکمہ زراعت

جمعرات 1 جنوری 2026 14:25

فیصل آباد (اُردو پوائنٹ اخبارتازہ ترین - اے پی پی۔ 01 جنوری2026ء) بہاریہ مکئی کی کاشت کابہترین وقت 15 جنوری سے فروری کے آخر تک ہے لہٰذا کاشتکار وں کوترقی دادہ سنتھیٹک اور ہائبرڈ اقسام کی کاشت کی ہدایت کی گئی ہے تاکہ وہ بہاریہ مکئی کی اچھی پیداوار حاصل کرنے میں کامیاب ہو سکیں۔ ڈائریکٹرمحکمہ زراعت توسیع فیصل آبادچوہدری خالد محمود نے اے پی پی کو بتایا کہ چونکہ بہاریہ مکئی کی بوائی 15 جنوری سے شروع ہو گی اسلئے کاشتکاروں کو چاہیے کہ وہ ابھی سے بہاریہ مکئی کی کاشت کیلئے منصوبہ بندی شروع کردیں تاکہ فصل کی کاشت میں تاخیر نہ ہو۔

انہوں نے کہاکہ مکئی اپنی پیداواری صلاحیت کی وجہ سے غلہ دار اجناس میں بڑی اہمیت کی حامل ہے جو پاکستان میں گندم اور چاول کے بعد رقبہ کے لحا ظ سے تیسرے نمبرپر کاشت ہونے والی فصل جبکہ فی ایکڑ اوسط پیداوار میں پہلے نمبر پر ہے۔

(جاری ہے)

انہوں نے بتایاکہ مکئی کی ایک سال میں 2کامیاب فصلیں موسم خریف اور موسم بہارمیں کاشت کی جاتی ہیں جس سے غلہ کی پیداوار میں خاطرخواہ اضافہ ہواہے۔

انہوں نے کہاکہ بہاریہ مکئی کی کاشت کیلئے ایسی بھاری میرازمین کا انتخاب ضروری ہے جو پانی کو بخوبی جذب کرنے کی صلاحیت کے علاوہ 7.5 پی ایچ کے قریب ہو۔ انہوں نے کہاکہ ایسی زمین جس میں برسیم یا آلو کاشت کئے گئے ہوں وہاں مکئی کی فصل بہتر نشو ونما پاتی ہے تاہم کلراٹھی، ریتلی، سیم زدہ اور 8.0 سے زائد پی ایچ کی حامل زمین بہاریہ مکئی کی کاشت کیلئے موزوں نہیں۔