احتساب عدالت لاہور،سابق وزیر اعلیٰ چوہدری پرویز الہٰی و دیگر کے خلاف کرپشن اور کک بیکس کے ریفرنس کی سماعت ملتوی

منگل 6 جنوری 2026 14:45

لاہور (اُردو پوائنٹ اخبارتازہ ترین - اے پی پی۔ 06 جنوری2026ء) لاہور کی احتساب عدالت نے سابق وزیر اعلیٰ پنجاب چوہدری پرویز الٰہی سمیت دیگر کے خلاف گجرات ترقیاتی منصوبوں میں کرپشن اور کک بیکس کے ریفرنس کی سماعت 08 جنوری تک ملتوی کرتے ہوئے اشتہاری ملزم مونس الٰہی کے اثاثے ضبط کرنے کے خلاف دائر درخواست پر قومی احتساب بیورو سے جواب طلب کر لیا ۔

احتساب عدالت کے جج رانا محمد عارف نے نیب ریفرنس کی سماعت کی، اس دوران سابق پرنسپل سیکرٹری پنجاب اسمبلی محمد خان بھٹی سمیت دیگرشریک ملزمان خالد محمود چھٹہ، سلمان احمد اور مظفر اقبال عدالت میں پیش ہوئے اور اپنی حاضری لگائی جبکہ پرویز الٰہی کی جگہ عدالتی اجازت کے ساتھ ان کے مقرر پلیڈر وکیل پیش ہوئے اور حاضری لگائی۔

(جاری ہے)

یاد رہے کہ عدالت نے چوہدری پرویز الٰہی کو ان کی درخواست پر حاضری سے استثنا دے رکھا ہے۔

دورانِ سماعت اشتہاری ملزم مونس الٰہی کے اثاثے ضبط کرنے کے خلاف دائر درخواست پر عدالت نے قومی احتساب بیورو سے جواب طلب کر لیا۔ دوران سماعت عدالت کو آگاہ کیا گیا کہ نیب نے نئے ملزم سلمان احمد سے متعلق سپلیمنٹری ریفرنس بھی جمع کرا دیا ہے جبکہ تمام ملزمان کو سپلیمنٹری ریفرنس کی نقول فراہم کر دی گئی ہیں۔ پرویز الٰہی کے نمائندہ وکیل کو بھی ریفرنس کی کاپی فراہم کی گئی۔واضح رہے کہ سابق وزیر اعلیٰ سمیت دیگر پر ترقیاتی منصوبوں میں کک بیکس اور رشوت لینے کا الزام ہے ،نیب نے پرویز الٰہی سمیت دیگر کے خلاف ریفرنس دائر جبکہ احتساب عدالت نے سابق وزیر اعلی سمیت دیگر ملزمان پر فرد جرم عائد کر رکھی ہے۔