بین الاقوامی اسلامی یونیورسٹی کا 90واں اکیڈمک کونسل اجلاس، اہم تعلیمی فیصلوں کی منظوری

اسلام آباد (اُردو پوائنٹ اخبارتازہ ترین - اے پی پی۔ 08 جنوری2026ء) بین الاقوامی اسلامی یونیورسٹی اسلام آباد کی اکیڈمک کونسل کا 90واں اجلاس گزشتہ روز ایڈمن بلاک، نیو کیمپس (سیکٹر ایچ-10 ) کے کونسل ہال میں منعقد ہوا۔ اجلاس کی صدارت صدر جامعہ پروفیسر ڈاکٹر احمد سعد الاحمد نے کی۔ اجلاس میں مجموعی طور پر 35 نکاتی ایجنڈے پر غور کیا گیا۔ کونسل نے 89ویں اجلاس کی کارروائی کی توثیق کی، اس پر مشاہدات پر تبادلہ خیال کیا اور سابقہ فیصلوں پر عملدرآمد کی رپورٹ کا جائزہ لیا جس پر پیشرفت پر اطمینان کا اظہار کیا گیا۔

ایجنڈے کے 35 نکات میں سے 28 کی منظوری دی گئی جبکہ پانچ نکات کو مزید غور و خوض کے لئے متعلقہ کمیٹیوں اور شعبہ جات کو بھجوا دیا گیا۔ اس کے علاوہ صدر جامعہ کی جانب سے بطور چیئرمین اکیڈمک کونسل پہلے سے منظور شدہ 15 نکات کی بھی توثیق کی گئی۔

(جاری ہے)

اہم فیصلوں میں فیکلٹی آف لینگویجز اینڈ لٹریچر، سوشل سائنسز، شریعہ اینڈ لا، اصول الدین اور سائنسز کے تحت پی ایچ ڈی، ماسٹرز، بیچلرز اور ڈپلومہ پروگرامز کے سکیمز آف سٹڈیز کی منظوری شامل ہے۔

فیکلٹی بورڈز کی جانب سے پیش کردہ ایم ایس اور پی ایچ ڈی پروگرامز کی سفارشات کی بھی توثیق کی گئی۔ اکیڈمک کونسل نے انڈرگریجویٹ پروگرامز کی فیس سٹرکچر میں نظرثانی کی منظوری دی اور بی ٹیک امیدواروں کو چار سالہ انجینئرنگ پروگرامز میں داخلے کی توثیق کی۔ اسی طرح BASR-98-2025 کے تحت آٹھ پی ایچ ڈی سکالرز سے متعلق سفارشات منظور کرتے ہوئے انہیں یونیورسٹی قواعد کے مطابق ڈگری کی تکمیل کے باقی مراحل طے کرنے کی اجازت دی گئی۔

اجلاس میں فیکلٹی آف سائنسز کے ڈین کی رپورٹ اور سفارشات کی منظوری دی گئی جس کے تحت بی ایس کیمسٹری پروگرام کے آغاز کی راہ ہموار ہو گئی۔ اس کے علاوہ بی ایس شماریات (ڈیٹا سائنسز)، بی ایس کمپیوٹیشنل میتھمیٹکس اور آرٹیفیشل انٹیلی جنس کے پروگرام اسٹرکچر اور کورس اسٹرکچر (PSP & CSP) کی بھی منظوری دی گئی۔اکیڈمک کونسل نے وفاقی وزارتِ منصوبہ بندی کے ساتھ لاہور میں بین الاقوامی اسلامی یونیورسٹی کے ایک جزوی/ذیلی ادارے کے قیام کے لئے مفاہمتی یادداشت پر پیش رفت کی منظوری بھی دی تاہم اس کو تمام قانونی اور انتظامی تقاضوں کی تکمیل سے مشروط رکھا گیا ہے۔

اجلاس کے اختتام پر اس عزم کا اعادہ کیا گیا کہ بین الاقوامی اسلامی یونیورسٹی اسلام آباد تعلیمی معیار کو مزید بہتر بنانے، نئے تعلیمی پروگرامز کے آغاز اور قومی ترجیحات کے مطابق ادارہ جاتی ترقی کے لئے اپنی کوششیں جاری رکھے گی۔