کراچی میں آئندہ ہفتے گرج چمک کے ساتھ بارش کا امکان

شہر کی فضاوں پر صبح کے وقت دھند چھانے کا سلسلہ برقرار رہ سکتا ہے،محکمہ موسمیات

جمعہ 16 جنوری 2026 15:40

کراچی میں آئندہ ہفتے گرج چمک کے ساتھ بارش کا امکان

کراچی (اُردو پوائنٹ اخبارتازہ ترین - این این آئی۔ 16 جنوری2026ء) محکمہ موسمیات نے شہر قائد میں آئندہ ہفتے کے دوران گرج چمک کے ساتھ بارش کا امکان ظاہر کر دیا۔تفصیلات کے مطابق جنوب مغربی سمت سے چلنے والی ہواؤں کے سبب کراچی میں ہلکے بادلوں کے ساتھ موسم خنک ہوگیا جبکہ ہوا میں نمی کا تناسب 87 فیصد رہا۔کمزور مغربی ہواؤں کا سلسلہ ملک میں داخل ہوگیا، جس کے باعث کراچی میں 22 اور 23 جنوری کو گرج چمک کے ساتھ بارش کا امکان ہے۔

محکمہ موسمیات کی ارلی وارننگ سینٹر پیش گوئی کے مطابق شہر کی فضاوں پر صبح کے وقت دھند چھانے کا سلسلہ برقرار رہ سکتا ہے جبکہ ہفتہ اور اتوار کو بھی دھند کے سبب حدنگاہ متاثر ہونے کا خدشہ ہے۔ہفتہ کو کم سے کم درجہ حرارت مزید ایک ڈگری اضافے سے 14 ڈگری تک تجاوز کر سکتا ہے۔

(جاری ہے)

محکمہ موسمیات کے مطابق اگلے 3 روز کے دوران صبح کے وقت شمال مشرقی اور سہ پہر میں سمندر کی جنوب مغربی ہوائیں چل سکتی ہیں۔

صبح و رات کے اوقات میں خنکی و سردی بدستور برقرار رہ سکتی ہے۔واضح رہے کہ شہر میں چند روز سے سردی کی شدت میں کمی محسوس کی جا رہی ہے جبکہ گزشتہ روز ہوا میں نمی کا تناسب 95 فیصد ہونے کے سبب شہر کے بیشتر علاقوں میں شدید دھند دیکھی گئی۔شہر میں شدید دھند کے باعث کراچی ایئرپورٹ پر ملکی اور غیر ملکی ایئرلائنز کی پروازیں تاخیر کا شکار ہوئیں جبکہ کئی پروازوں کو منسوخ بھی کرنا پڑا۔