بورڈ آف انٹرمیڈیٹ اینڈ سیکنڈری ایجوکیشن کے ایس اسی سی پارٹ ون اور ٹو 2026 کے امتحانات کے انتظامات کا جائزہ اجلاس

بدھ 28 جنوری 2026 22:29

راولپنڈی (اُردو پوائنٹ اخبارتازہ ترین - اے پی پی۔ 28 جنوری2026ء) کمشنر راولپنڈی ڈویژن انجینئر عامر خٹک نے بورڈ آف انٹرمیڈیٹ اینڈ سیکنڈری ایجوکیشن (BISE) کے امتحانات کے حوالے سے منعقدہ اجلاس کی صدارت کرتے ہوئے کہا کہ قبل از امتحانات تمام تیاریاں مکمل کی جائیں۔ ہارڈ سینٹرز کی تعداد بڑھائی جائے اور وہاں مانیٹرنگ مزید سخت کی جائے۔ انہوں نے کہا کہ پورا سال محنت کرنے والے طلباء کے استحصال کی اجازت کسی کو نہیں دی جائے گی ، اس لئے بوٹی مافیہ اور ناجائز ذرائع کے استعمال سے کسی کو ان محنتی طلباء کا حق نہیں لینے دیا جائے گا۔

کمشنر راولپنڈی نے مزید کہا کہ حساس اداروں کی لسٹنگ کی جائے اور متعلقہ اسسٹنٹ کمشنرز و تحصیلدار ان سینٹرز پر خود ڈیوٹی دیں گے۔انہوں نے کہا کہ امتحانات کے دوران موثر مانیٹرنگ کے لئے سٹیٹ آف دی آرٹ کنٹرول روم قائم کیے جائیں جہاں پر متعلقہ سٹاف کا ڈیوٹی روسٹر ایشو کرتے ہوئے اس کی پراپر مانیٹرنگ کو یقینی بنائا جائے۔

(جاری ہے)

کمشنر راولپنڈی نے امتحانی عمل کی مؤثر نگرانی کے لیے تفصیلی چیک لسٹس تیار کرنے کی ہدایت دیتے ہوئے کہا کہ اس بات کو یقینی بنایا جائے کہ تمام انتظامی و امتحانی امور کی پیشرفت واضح طور پر سامنے ہو۔

اس موقع پر بریفنگ دیتے ہوئے بتایا گیا کہ ڈویژن بھر میں کل 400 امتحانی مراکز قائم کیے جا رہے ہیں۔ اس بار ہارڈ سینٹرز کی تعداد سو سے بڑھا کر 150 کر دی گئی ہے۔ سوالنامہ کی تیاری و چھپائی، غیر حل شدہ جواب نامہ شیٹس کی امتحانی سینٹرز پر ڈیلیوری، سینٹرل کنٹرول روم، امتحانی مراکز پر سی سی ٹی وی کیمرہ کی تنصیب اور سٹاف کی ٹریننگ جاری ہے۔ ان تمام سرگرمیوں کو 20 فروری سے قبل مکمل کر لیا جائے گا۔کمشنر آفس میں منعقدہ SSS I & II امتحانات کے انتظامات سے متعلقہ اس جائزہ اجلاس میں ایڈیشنل کمشنر ریونیو ، کنٹرولر امتحانات تنویر اصغر اعوان، سیکرٹری بورڈ امجد اقبال و دیگر متعلقہ افسران نے شرکت کی۔

Facebook Twitter Google + Share on Whatsapp

بورڈ آف انٹرمیڈیٹ اینڈ سیکنڈری ایجوکیشن کے ایس اسی سی پارٹ ون اور ٹو 2026 کے امتحانات کے انتظامات کا جائزہ اجلاس

مزید تعلیم کی خبریں