بسنت پر لاہور میں بارش کا امکان مسترد

بسنت منانے کے لیے موسم آئیڈیل ہوگا‘چیف میٹرولوجسٹ

جمعہ 30 جنوری 2026 20:11

لاہور (اُردو پوائنٹ اخبارتازہ ترین - این این آئی۔ 30 جنوری2026ء) چیف میٹرولوجسٹ نے بسنت فیسٹیول کے دوران لاہور میں بارش کے امکان کو مسترد کرتے ہوئے خوشگوار اور موزوں موسم کی پیشگوئی کی ہے۔

(جاری ہے)

نجی ٹی وی سے گفتگو کرتے ہوئے چیف میٹرولوجسٹ ڈاکٹر ظہیر بابر نے بتایا کہ بسنت کے تینوں دن موسم سازگار رہے گا اور بسنت منانے کے لیے موسم آئیڈیل ہوگا، جبکہ اس دوران بارش کا کوئی امکان نہیں ہے۔

ان کا کہنا تھا کہ ان دنوں بادل جزوی طور پر موجود رہیں گے، ساتھ ہی ہلکی سے معتدل ہوا بھی چلے گی۔ رات کے وقت موسم قدرے خنک رہے گا، جبکہ دن کے درجہ حرارت میں بتدریج اضافے کا امکان ہے۔چیف میٹرولوجسٹ کے مطابق شہری موسمِ بہار کے اس تہوار کو بھرپور انداز میں انجوائے کر سکیں گے۔واضح رہے کہ لاہور میں بسنت فیسٹیول 6فروری سے 8فروری تک منایا جائے گا۔