گورنمنٹ کالج یونیورسٹی لاہور میں 125ویں سالانہ کھیلوں کا آغاز

منگل 10 فروری 2026 22:41

لاہور (اُردو پوائنٹ اخبارتازہ ترین - آن لائن۔ 10 فروری2026ء) گورنمنٹ کالج یونیورسٹی لاہور میں 125ویں سالانہ کھیلوں کا باقاعدہ آغاز ہوگیا۔ افتتاحی تقریب میں یونیورسٹی کے طلبہ و طالبات کے دستوں نے مارچ پاسٹ کیا، جس میں خصوصی طلبہ کا دستہ بھی شامل تھا۔افتتاحی تقریب کے مہمانِ خصوصی نامور صنعتکار حمزہ طارق صوفی تھے، جبکہ تقریب میں وائس چانسلر پروفیسر ڈاکٹر محمد عمر چوہدری، اولڈ راوینز یونین کے صدر اطہر اسماعیل، چیئرمین سپورٹس بورڈ یاسر سلطان، ڈائریکٹرسپورٹس جی سی یو محمد وسیم اختر اور رجسٹرار ڈاکٹر شوکت علی نے بھی شرکت کی۔

مارچ پاسٹ میں یونیورسٹی کے 40 سے زائد شعبہ جات کے دستوں نے حصہ لیا۔وائس چانسلر پروفیسر ڈاکٹر محمد عمر چوہدری نے خطاب میں کہا کہ یہ صرف سپورٹس مقابلے نہیںبلکہ جی سی یو کی روایات اور تاریخ کا جشن ہے۔

(جاری ہے)

انہوں نے کہا کہ ہمیں اپنی تاریخ اور روایات کو زندہ رکھنا ہوگا اور طلبہ کو ایسا کردار اپنانا چاہیے جس پر گورنمنٹ کالج یونیورسٹی فخر کرسکے۔

مہمانِ خصوصی حمزہ طارق صوفی نے خطاب کرتے ہوئے کہا کہ صوفی گروپ تعلیم اور کھیلوں کے فروغ کے لیے عملی اقدامات کر رہا ہے۔ انہوں نے طلبہ پر زور دیا کہ وہ اپنے ادارے اور والدین کا نام روشن کریں۔ اس موقع پر جی سی یو میںسپورٹس کے 125 سال مکمل ہونے پر کیک بھی کاٹا گیا۔ مارچ پاسٹ مقابلوں میں یونیورسٹی کی سطح پر کامرس اینڈ فنانس نے پہلی، بائیوٹیکنالوجی نے دوسری،سسٹین ایبل ڈیویلپمنٹ سٹڈی سینٹر نے تیسری جبکہ انٹرنیشنل ریلیشنز نے چوتھی پوزیشن حاصل کی۔انٹرمیڈیٹ کی سطح پر مارچ پاسٹ میں پری میڈیکل گروپ نے پہلی، پری انجینئرنگ گروپ نے دوسری جبکہ کامرس اینڈ آئی سی ایس گروپ نے تیسری پوزیشن حاصل کی۔