زرعی یونیورسٹی فیصل آباد میں عالمی دن برائے ”شدت پسندانہ رویوں کی روک تھام“ کے حوالے سے سیمینار

جمعرات 12 فروری 2026 19:51

فیصل آباد (اُردو پوائنٹ اخبارتازہ ترین - اے پی پی۔ 12 فروری2026ء) زرعی یونیورسٹی فیصل آباد میں عالمی دن برائے ”شدت پسندانہ رویوں کی روک تھام“ کے حوالے سے سیمینار اور واک کا انعقاد کیا گیا۔ فیکلٹی آف سوشل سائنسز کے انسٹیٹیوٹ آف ایگریکلچرل ایکسٹینشن اور فیکلٹی آف آرٹس اینڈ ہیومینیٹیز کے شعبہ انگریزی کے زیر اہتمام کیمپس میں علیحدہ علیحدہ خصوصی آگاہی سیشن اور واک کا انعقاد کیا گیا۔

اپنے پیغام میں وائس چانسلر پروفیسر ڈاکٹر ذوالفقار علی نے کہا کہ جامعات محض تعلیم کے مراکز ہی نہیں بلکہ نوجوانوں کو نفرت اور تشدد کو مسترد کرنے کے قابل بنانے کے پلیٹ فارم بھی ہیں۔ انہوں نے کہا کہ تعلیم انتہا پسندانہ بیانیے کا مقابلہ کرنے اور مضبوط و پائیدار معاشروں کی تشکیل کے لیے مؤثر ہتھیار ہے۔

(جاری ہے)

انہوں نے کہا کہ پرتشدد انتہا پسندی عالمی امن اور پائیدار ترقی کے لیے سنگین خطرہ ہے۔

انہوں نے مزید کہا کہ ایک تعلیمی ادارے کے طور پر زرعی یونیورسٹی طلبہ میں رواداری، باہمی احترام اور بقائے باہمی کی اقدار کو فروغ دینے کے لیے پُرعزم ہے۔ انہوں نے کہا کہ نوجوانوں کو علم، اخلاقی اقدار اور تنقیدی سوچ سے آراستہ کرنا ضروری ہے تاکہ وہ تعمیری مکالمے اور تخریبی نظریات میں فرق کر سکیں۔ انہوں نے طلبہ پر زور دیا کہ وہ زندگی کے ہر شعبے میں اتحاد، سماجی ہم آہنگی اور تنوع کے احترام کو فروغ دیں۔ اس موقع پر ڈین ڈاکٹر شازیہ رمضان، ڈاکٹر اعجاز اشرف، ڈاکٹر شوکت علی، ڈاکٹر رفیع مزمل، جہازیب طارق، ڈاکٹر طاہر، ڈاکٹر عاصم عقیل، ڈاکٹر عطا مصطفیٰ، ڈاکٹر کاشف، ڈاکٹر بہادر اور دیگر نے بھی خطاب کیا۔