گوجرخان ، جدید مریم نواز گرین الیکٹرک بس سروس کا افتتاح

پیر 16 فروری 2026 21:55

گوجر خان(اُردو پوائنٹ اخبارتازہ ترین - این این آئی۔ 16 فروری2026ء) گوجر خان میں جدید مریم نواز گرین الیکٹرک بس سروس کا باقاعدہ افتتاح صوبائی وزیر ٹرانسپورٹ بلال اکبر خان نے کر دیا۔تقریب سے خطاب کرتے ہوئے صوبائی وزیر ٹرانسپورٹ بلال اکبر خان نے وزیر اعلیٰ پنجاب مریم نواز شریف کی عوام دوست پالیسیوں کو سراہتے ہوئے کہا کہ گرین الیکٹرک بس منصوبہ شہریوں کو محفوظ،سستی اور ماحول دوست سفری سہولت فراہم کرنے کی جانب ایک اہم سنگ میل ہے۔

انہوں نے کہا کہ تمام بسوں میں فری وائی فائی اور موبائل چارجنگ کی سہولت فراہم کی گئی ہے جبکہ خواتین کو ہراسمنٹ سے محفوظ رکھنے کیلئے بسوں میں سی سی ٹی وی کیمرے بھی نصب کیے گئے ہیں۔انہوںنے کہاکہ یہ منصوبہ جدید سفری سہولیات کے ساتھ ساتھ شہریوں کے تحفظ کو بھی یقینی بناتا ہے۔

(جاری ہے)

اس موقع پر صوبائی وزیر محمد منشا اللہ بٹ نے خطاب کرتے ہوئے کہا کہ مریم نواز شریف پنجاب میں اپنی شاندار کارکردگی کے ذریعے میاں نواز شریف اور میاں شہباز شریف کے نقش قدم پر چلتے ہوئے صوبے کی تعمیر و ترقی کے لیے دن رات ایک کیے ہوئے ہیں۔

انہوں نے کہا کہ صحت،تعلیم،ٹرانسپورٹ اور صفائی سمیت ہر شعبے میں انقلابی اقدامات کیے جا رہے ہیں جن کے ثمرات عوام تک پہنچ رہے ہیں۔ایم پی اے راجہ شوکت عزیز بھٹی نے کہا کہ چاہے پنجاب کی ترقی کی بات ہو، ستھرا پنجاب پروگرام، رمضان پیکیج، راشن کارڈز یا الیکٹرک بسوں جیسے منصوبے ہوں پنجاب کے عوام کی فلاح و بہبود کے ہر منصوبے میں مریم نواز شریف کا نام نمایاں نظر آتا ہے۔

سابق ایم این اے راجہ جاوید اخلاص نے کہا کہ ترقی کا جو سفر 2018میں رک گیا تھا وہ گزشتہ دو برسوں میں دوبارہ شروع ہو چکا ہے۔ انہوں نے کہا کہ ملک میں جب بھی تعمیر و ترقی کا عمل آگے بڑھا، وہ مسلم لیگ (ن)کے ادوار میں ہی ممکن ہوا اور اب مریم نواز شریف کی قیادت میں پنجاب ایک بار پھر ترقی کی راہ پر گامزن ہے۔ شرکاء نے گرین بس سروس کے آغاز کو خوش آئند قرار دیتے ہوئے کہا کہ اس منصوبے سے نہ صرف شہریوں کو جدید سفری سہولت میسر آئے گی بلکہ ماحولیاتی آلودگی میں بھی نمایاں کمی آئے گی۔ عوام نے حکومت پنجاب کے اس اقدام کو علاقے کے لیے ایک بڑی پیش رفت قرار دیا۔

Facebook Twitter Google + Share on Whatsapp

گوجرخان ، جدید مریم نواز گرین الیکٹرک بس سروس کا افتتاح

متعلقہ عنوان :

مزید قومی خبریں