ویمن یونیورسٹی ملتان میں استقبال رمضان کے حوالے سے روحانی و فکری سیمینار

ملتان (اُردو پوائنٹ اخبارتازہ ترین - اے پی پی۔ 19 فروری2026ء) ویمن یونیورسٹی ملتان کے شعبہ علوم اسلامیہ و عربی کے زیر اہتمام ’’رمضان المبارک روحانی تجدید رحمت اور الٰہی نعمتوں کا مہینہ‘‘ کے عنوان سے سیمینار منعقد کیا گیا۔ ترجمان کے مطابق سیمینار کا مقصد رمضان المبارک کے مقدس مہینے کا باوقار استقبال کرنا اور اسلامی تعلیمات کی روشنی میں اس کی روحانی، اخلاقی اور سماجی اہمیت کو اجاگر کرنا ہے ۔

سیمینار سے خطاب کرتے ہوئے وائس چانسلر پروفیسر ڈاکٹر کلثوم پراچہ نےکہا ہے کہ رمضان المبارک محض روزہ رکھنے کا مہینہ نہیں بلکہ یہ تزکیہ نفس، احتسابِ ذات اور روحانی ارتقا کا ایک جامع تربیتی پروگرام ہے ۔رمضان المبارک انسان کو صبر، برداشت، ہمدردی، ایثار اور نظم و ضبط جیسی اعلیٰ اخلاقی اقدار سکھاتا ہے۔

(جاری ہے)

یہ مہینہ ہمیں بھوک اور پیاس کے ذریعے معاشرے کے محروم طبقات کے احساس سے جوڑتا ہے اور خدمتِ خلق کا جذبہ بیدار کرتا ہے۔

انہوں نے کہا کہ طالبات اس مقدس مہینے کو خود احتسابی، عبادات میں اضافہ، تلاوتِ قرآن پاک، ذکر و اذکار اور صدقات کے ذریعے اپنی روحانی اصلاح کا ذریعہ بنائیں ۔انہوں نے کہا کہ ایک تعلیمی ادارے کی حیثیت سے ہماری ذمہ داری ہے کہ ہم علمی ترقی کے ساتھ ساتھ اخلاقی و روحانی تربیت کو بھی اپنی ترجیحات میں شامل رکھیں۔ رمضان المبارک طالبات کے لیے اپنی ذاتی اور پیشہ ورانہ زندگی میں اسلامی اقدار کو اپنانے کا بہترین موقع ہے۔

یونیورسٹی میں ایسے روحانی و فکری پروگرام امز کا تسلسل جاری رکھا جائے گا تاکہ طالبات ہمہ جہت ترقی حاصل کر سکیں۔ ممتاز عالم دین پروفیسر ڈاکٹر سعید الرحمن نےکہا کہ رمضان المبارک کا بنیادی مقصد تقویٰ کا حصول ہے، جو انسان کو گناہوں سے بچا کر نیکیوں کی طرف مائل کرتا ہے ۔روزہ انسان میں ضبط نفس، صبر اور روحانی پاکیزگی پیدا کرتا ہے ،طالبات خلوصِ نیت کے ساتھ عبادات، تلاوتِ قرآن پاک ، صدقہ و خیرات اور سنتِ نبوی ﷺ پر عمل پیرا ہو کر اللہ تعالیٰ کا قرب حاصل کریں۔

اس موقع پر زکریا یونیورسٹی کے شعبہ عربی کی چیئرپرسن پروفیسر ڈاکٹر عذرا پروین نے عفو و درگزر، بھائی چارے اور معاشرتی ہم آہنگی کو فروغ دینے کی ضرورت پر زور دیا ۔ڈائریکٹر انسٹی ٹیوٹ آف اسلامک سٹڈیز بی زیڈ یو پروفیسر ڈاکٹر منزہ حیات نے کہا کہ رمضان المبارک انسان کی زندگی میں مثبت تبدیلی لانے کی غیر معمولی صلاحیت رکھتا ہے ۔یہ مہینہ دلوں کو پاک کرنے، ایمان کو مضبوط بنانے اور اپنے اعمال کی اصلاح کا بہترین موقع فراہم کرتا ہے۔ سیمینار کے اختتام پر امتِ مسلمہ کی سلامتی، خوشحالی اور اتحاد کے لیے خصوصی دعا کی گئی۔ سیمینار میں فیکلٹی ممبران اور طالبات کی بڑی تعداد نے شرکت کی۔