قومی وطن پارٹی عیدالفطر کے بعد صوبائی حکومت کے خلاف بھرپور احتجاجی مہم چلائے گی، شاہ ولی خان پڑانگ

جمعرات 5 مارچ 2026 16:47

پشاور (اُردو پوائنٹ اخبارتازہ ترین - اے پی پی۔ 05 مارچ2026ء) خیبر پختونخوا میں تبدیلی کے نام پر تباہی کے 13 سالہ سفر کے خلاف قومی وطن پارٹی نے عیدالفطر کے بعد بھرپور احتجاجی مہم کا اعلان کیا ہے۔ قومی وطن پارٹی پشاور کے سٹی چیئرمین الحاج شاہ ولی خان پڑانگ نے اپنے ایک بیان میں صوبے کی موجودہ صورتحال پر تشویش کا اظہار کرتے ہوئے کہا کہ خیبر پختونخوا میں گزشتہ 13 سال سے جاری "تبدیلی" کا نام نہاد ڈرامہ اب عوام کے لیے ایک بھیانک خواب بن چکا ہے۔

انہوں نے کہا کہ عیدالفطر کے بعد پی ٹی آئی کی کرپٹ حکومت کے خلاف احتجاجی مہم محض سیاسی اعلان نہیں بلکہ صوبے کے مظلوم عوام کی سسکیوں کا ردعمل ہے۔ حاجی شاہ ولی خان پڑانگ نے دعویٰ کیا کہ پی ٹی آئی کے دورِ اقتدار کا سب سے بڑا المیہ "غریب مکاؤ" پالیسی ہے جس نے سفید پوش طبقے اور دیہاڑی دار مزدور کو دو وقت کی روٹی کا محتاج کر دیا ہے۔

(جاری ہے)

انہوں نے کڑی تنقید کرتے ہوئے کہا کہ جن ارکانِ اسمبلی کے پاس کل تک سائیکل نہیں تھی، وہ آج لینڈ کروزروں اور عالی شان محلات کے مالک بن چکے ہیں جبکہ متوسط طبقہ بے روزگاری کے بوجھ تلے دب کر غربت کی لکیر سے نیچے جا چکا ہے۔

انہوں نے کہا کہ "صاف چلی شفاف چلی" کے دعویداروں نے بی آر ٹی، مالم جبہ اور بلین ٹری سونامی جیسے منصوبوں کو کرپشن کی نذر کر کے صوبے کو قرضوں کی دلدل میں دھکیل دیا ہے، ہسپتالوں میں ادویات ناپید ہیں اور تعلیمی نظام ابتر ہو چکا ہے۔ حاجی شاہ ولی خان پڑانگ نے واضح کیا کہ اب خاموشی جرم ہے، عید کے بعد شروع ہونے والی احتجاجی مہم اس کرپٹ ٹولے کے سیاسی زوال کا آغاز ثابت ہوگی۔ انہوں نے کہا کہ خیبر پختونخوا کے غیور عوام اب ان لٹیروں سے حساب مانگ رہے ہیں جنہوں نے عوام کا نوالہ چھین کر اپنے بینک بیلنس بھرے ہیں۔