میٹرک امتحانات شفاف بنانے کیلئے افسران کو فیلڈ میں رہنے کا حکم

جمعرات 26 مارچ 2026 22:38

لاہور(اُردو پوائنٹ اخبارتازہ ترین - آن لائن۔ 26 مارچ2026ء) وزیر تعلیم رانا سکندر حیات کی زیر صدارت آل پنجاب کمشنرز اجلاس منعقد ہوا جس میں 27 مارچ سے شروع ہونے والے میٹرک امتحانات کے انتظامات کا تفصیلی جائزہ لیا گیا۔ اجلاس میں شفاف امتحانات کے انعقاد کو یقینی بنانے کے لیے اہم ہدایات جاری کی گئیں۔ذرائع کے مطابق وزیر تعلیم نے سنٹرز کی کڑی مانیٹرنگ کی ہدایت کرتے ہوئے واضح کیا کہ 27 مارچ سے تمام افسران فیلڈ میں موجود رہیں اور ہر امتحانی مرکز کی خود نگرانی کریں۔

انہوں نے سختی سے تاکید کی کہ افسران دفاتر میں بیٹھنے کے بجائے عملی طور پر سنٹرز کا دورہ کریں۔اس موقع پر تمام کمشنرز، ڈپٹی کمشنرز، اسسٹنٹ کمشنرز اور دیگر متعلقہ افسران کو امتحانی مراکز میں موجود رہنے کی ہدایت دی گئی تاکہ کسی بھی بے ضابطگی کو فوری روکا جا سکے۔

(جاری ہے)

رانا سکندر حیات نے پیپر لیکج اور چیٹنگ مافیا کو ناقابل برداشت قرار دیتے ہوئے شفاف اور فول پروف انتظامات یقینی بنانے کا حکم دیا۔

انہوں نے کہا کہ حساس اور ہارڈ ایریاز میں خصوصی نگرانی کی جائے اور تمام امتحانی سنٹرز پر سیفٹی مئرز فراہم کیے جائیں۔مزید ہدایت کی گئی کہ حساس سنٹرز میں سی سی ٹی وی کیمروں کی تنصیب اور ان کی فعالیت کو ہر صورت یقینی بنایا جائے تاکہ کسی بھی غیر قانونی سرگرمی کی بروقت نشاندہی ہو سکے۔وزیر تعلیم کا کہنا تھا کہ ہر طالب علم کی محنت کا صلہ اسے ملنا چاہیے اور چیٹنگ مافیا کی سخت حوصلہ شکنی کی جائے گی۔ انہوں نے یہ بھی بتایا کہ اس سال نجی اداروں میں امتحانی سنٹرز نہ بنانے سے سرکاری فنڈز کی بچت ہوگی۔