چیئرمین سینیٹ کا سابق گورنر پنجاب سردار ذوالفقار علی کھوسہ کے انتقال پر گہرے دکھ اور افسوس کا اظہار

جمعہ 10 اپریل 2026 00:02

اسلام آباد (اُردو پوائنٹ اخبارتازہ ترین - اے پی پی۔ 10 اپریل2026ء) چیئرمین سینیٹ سید یوسف رضا گیلانی نے سابق گورنر پنجاب سردار ذوالفقار علی کھوسہ کے انتقال پر گہرے دکھ اور افسوس کا اظہار کیا ہے۔ اپنے تعزیتی پیغام میں چیئرمین سینیٹ نے کہا کہ سردار ذوالفقار علی کھوسہ ایک منجھے ہوئے سیاستدان، مدبر رہنما اور عوامی خدمت کے جذبے سے سرشار شخصیت تھے، جنہوں نے اپنی پوری زندگی ملک و قوم کی خدمت کے لیے وقف کیے رکھی۔

انہوں نے کہا کہ مرحوم کی سیاسی و سماجی خدمات نہایت قابلِ قدر ہیں اور انہیں ہمیشہ سنہری الفاظ میں یاد رکھا جائے گا۔چیئرمین سینیٹ نے مزید کہا کہ سردار ذوالفقار علی کھوسہ کا تعلق صوبہ پنجاب کے علاقے ڈیرہ غازی خان سے تھا اور وہ اس خطے کے عوام کی نمائندگی کرتے ہوئے ہمیشہ ان کے مسائل کے حل کے لیے کوشاں رہے۔

(جاری ہے)

ان کی قیادت، بصیرت اور عوام دوستی کی مثالیں آج بھی زندہ ہیں۔

سید یوسف رضا گیلانی نے مرحوم کے انتقال کو قومی سیاست کے لیے ایک بڑا نقصان قرار دیتے ہوئے کہا کہ ان کی خدمات کو ہمیشہ قدر کی نگاہ سے دیکھا جائے گا۔ چیئرمین سینیٹ نے مرحوم کے درجات کی بلندی، مغفرت اور لواحقین کے لیے صبرِ جمیل کی دعا کرتے ہوئے کہا کہ اللہ تعالیٰ اہلِ خانہ کو یہ صدمہ برداشت کرنے کی توفیق عطا فرمائے۔