گومل یونیورسٹی میں کھلی کچہری کا انعقاد ، طلباء نے تعلیمی انتظامی ودیگر مسائل پیش کئے،وائس چانسلر کی حل کی یقین دہانی

ہفتہ 18 اپریل 2026 20:21

ڈیرہ اسماعیل خان(اُردو پوائنٹ اخبارتازہ ترین - این این آئی۔ 18 اپریل2026ء) وزیر اعلی خیبرپختونخوا سہیل خان آفریدی کی خصوصی ہدایات پرگومل یونیورسٹی ڈیرہ اسماعیل خان میں وائس چانسلر پروفیسر ڈاکٹر محمد ظفر اقبال کی سربراہی میں کھلی کچہری کا خصوصی انعقاد کیا گیا۔جس میں پرو وائس چانسلر پروفیسر ڈاکٹر نعمت اللہ بابر ،رجسٹرار ظاہر شاہ مروت ،ڈینز اور تمام شعبہ جات کے سربراہان نے بھی شرکت کی۔

یہ اقدام خیبرپختونخوا حکومت کی جانب سے شروع کیے گئے ایک اہم عوام دوست پروگرام کا حصہ ہے، جس کا مقصد طلبہ اور عام عوام کو ایک ایسا براہِ راست اورموثر پلیٹ فارم فراہم کرنا ہے جہاں وہ حکومتی اداروں اور متعلقہ حکام کے ساتھ بلا جھجھک رابطہ قائم کر سکیں اور اپنے مسائل پیش کر سکیں۔

(جاری ہے)

اسی سلسلے کو آگے بڑھاتے ہوئے گومل یونیورسٹی میں منعقدہ کھلی کچہری میں طلبہ کی بڑی تعداد نے شرکت کی اور اپنے تعلیمی، انتظامی اور دیگر مسائل براہِ راست وائس چانسلر اور متعلقہ حکام کے سامنے پیش کیے۔

اس موقع پر طلبہ کو اپنی شکایات، تجاویز اور آرا پیش کرنے کا بھرپور موقع فراہم کیا گیا، جسے طلبہ نے سراہا۔وائس چانسلر پروفیسر ڈاکٹر محمد ظفر اقبال نے کھلی کچہری سے بات چیت کرتے ہوئے کہا کہ گومل یونیورسٹی انتظامیہ طلبہ کے مسائل کے حل کے لیے سنجیدہ اور پرعزم ہے۔ وائس چانسلر پروفیسر ڈاکٹر محمد ظفر اقبال نے یقین دہانی کروائی کہ پیش کیے گئے تمام مسائل کو ترجیحی بنیادوں پر حل کیا جائے گا اور جہاں فوری اقدامات ممکن ہوں گے وہاں موقع پر ہی فیصلے کیے جائیں گے۔

انہوں نے مزید کہا کہ اس طرح کی کھلی کچہریوں کا مقصد طلبہ اور انتظامیہ کے درمیان فاصلے کم کرنا، شفافیت کو فروغ دینا اور میرٹ کی بالادستی کو یقینی بنانا ہے۔ ان کا کہنا تھا کہ طلبہ کی رہنمائی اور مسائل کا بروقت حل یونیورسٹی کی اولین ترجیح ہے۔اور کھلی کچہری جیسے اقدامات نہ صرف طلبہ کے اعتماد میں اضافہ کرتے ہیں بلکہ تعلیمی اداروں میں مثبت ماحول کو بھی فروغ دیتے ہیں۔ انہوں نے امید ظاہر کی کہ اس سلسلے کو مستقل بنیادوں پر جاری رکھا جائے گا تاکہ طلبہ کے مسائل بروقت حل ہوتے رہیں۔

Facebook Twitter Google + Share on Whatsapp

گومل یونیورسٹی میں کھلی کچہری کا انعقاد ، طلباء نے تعلیمی انتظامی ودیگر مسائل پیش کئے،وائس چانسلر کی حل کی یقین دہانی

متعلقہ عنوان :

مزید تعلیم کی خبریں