اسلام آباد یونائیٹڈ پلے آف مرحلے میں پہنچنے والی تیسری ٹیم بن گئی

ہفتہ 25 اپریل 2026 18:07

ّلاہور(اُردو پوائنٹ اخبارتازہ ترین - آن لائن۔ 25 اپریل2026ء) اسلام آباد یونائیٹڈ کی ٹیم حیدر آباد کنگز مین کو شکست دیکر پلے آف مرحلے میں پہنچنے والی تیسری ٹیم بن گئی۔لاہور قلندرز، کراچی کنگز، حیدرآباد کنگزمین اور کوئٹہ گلیڈی ایٹرز پلے آف کی دوڑ میں شامل ہیں۔حیدرآباد کنگزمین کے خلاف جیت کے سبب اسلام آباد یونائیٹڈ نے 11 پوائنٹس کے ساتھ نہ صرف ٹاپ فور میں جگہ پکی کرلی بلکہ پلے آف کیلیے بھی کوالیفائی کرلیا۔

میچ میں صرف 80 رنز پر آؤٹ ہونے اور شکست کے سبب حیدرآباد کنگزمین کا رن ریٹ بھی کم ہوگیا اور و ہ پانچویں نمبر پر چلی گئی جبکہ لاہور قلندرز کو ٹیبل پر چوتھے نمبر پر قدم جمانے کا موقع مل گیا ہے۔اس وقت ٹیبل پر صورتحال بڑی دلچسپ ہوگئی ہے، لاہور قلندرز، حیدرآباد کنگزمین اور کراچی کنگز کے 8، 8 پوائنٹس ہیں اور یہ تینوں ٹیمیں پلے آف کی آخری ٹیم کے طور پر مضبوط اُمیدوار ہیں۔

(جاری ہے)

اب آخری میچوں میں بات ان ٹیموں کی جیت کی نہیں رہی بلکہ ان کو فتح کے ساتھ ساتھ اپنا نیٹ رن ریٹ بھی بہتر کرنا ہوگا۔یہ کہہ سکتے ہیں حیدرآباد کنگزمین کو لاہور قلندرز اور کراچی کنگز پر کچھ ایڈوانٹیج حاصل ہے کیونکہ حیدرآباد کنگزمین کا آخری مقابلہ کراچی اور لاہور کے میچوں کے بعد ہوگا۔دوسری جانب اسلام آباد یونائیٹڈ کی ٹیم کی حیدرآباد کنگزمین کے خلاف فتح سے کوئٹہ گلیڈی ایٹرز کے لیے بھی ٹاپ فور میں پہنچنے کی کچھ اُمیدیں پیدا ہوگئی ہیں۔

اس وقت کوئٹہ گلیڈی ایٹرز کے 6 پوائنٹس ہیں اور اُس کا آخری میچ آج کراچی کنگز کے خلاف ہے۔اگر کوئٹہ گلیڈی ایٹرز کی ٹیم کراچی کنگز کو، پشاور زلمی، لاہور قلندرز کو اور راولپنڈیز کی ٹیم حیدرآباد کنگزمین کو شکست دینے میں کامیاب ہوتی ہے تو 4 ٹیموں کے 8، 8 پوائنٹس ہوجائیں گے تو اُس صورت میں فیصلہ بہتر رن ریٹ کی بُنیاد پر ہوگا۔