متنوع زرعی و موسمی حالات، زرخیز زمین اوربرآمدی منڈیوں کے باعث پھولوں کی کاشت بے پناہ صلاحیت موجود ہے‘فلوریکلچر ماہرین

ہفتہ 25 اپریل 2026 21:34

جڑانوالہ (اُردو پوائنٹ اخبارتازہ ترین - آن لائن۔ 25 اپریل2026ء) زرعی یونیورسٹی فیصل آباد کے فلوریکلچر ماہرین نے کہا ہے کہ ملک میں متنوع زرعی و موسمی حالات، زرخیز زمین اور بڑھتی ہوئی مقامی و برآمدی منڈیوں کے باعث پھولوں کی کاشت کے شعبے میں بے پناہ صلاحیت موجود ہے جبکہ مقامی سطح پر پھولوں کے بیجوں کی پیداوار درآمدی انحصار کم کرنے اور کاشتکاروں کی آمدن میں اضافے کے لیے اہم کردار ادا کر سکتی ہے۔

ان خیالات کا اظہار انہوں نے انسٹی ٹیوٹ آف ہارٹیکلچر سائنسز کے زیراہتمام قومی کانفرنس بعنوان ’’مقامی پھولوں کے بیجوں کی پیداوار اور ویلیو چین مینجمنٹ‘‘ سے خطاب کرتے ہوئے کیا۔ ڈین کلیہ زراعت ڈاکٹر غلام مرتضیٰ نے پھولوں کے درآمدی بیجوں پر انحصار کم کرنے کے لیے مقامی بیجوں کی پیداوار کو فروغ دینے کی ضرورت پر زور دیا۔

(جاری ہے)

انہوں نے کہا کہ مقامی بیجوں کی تیاری کو مضبوط بنانے سے نہ صرف معیار بہتر ہوگا بلکہ پیداواری لاگت میں کمی اور کاشتکاروں کے منافع میں اضافہ بھی ہوگا۔

انہوں نے اس شعبے کے لیے جدید حل اور تربیت یافتہ افرادی قوت فراہم کرنے میں تعلیمی اداروں کے کردار کو بھی اجاگر کیا۔ ڈائریکٹر ہارٹیکلچر ڈاکٹر احمد ستار نے کہا کہ بیجوں کی پیداوار سے لے کر منڈی تک رسائی تک ایک مضبوط ویلیو چین کی تشکیل پائیدار ترقی کے لیے ناگزیر ہے۔ انہوں نے مزید کہا کہ پبلک پرائیویٹ شراکت داری اور کسانوں کی تربیت کے پروگرام معیاری پیداوار اور بہتر مارکیٹ روابط کے لیے کلیدی اہمیت رکھتے ہیں۔

نامور ماہر ہارٹیکلچر ڈاکٹر محمد اسلم نے جدید افزائش نسل کی تکنیک، بیجوں کے معیار کے اصولوں اور بعد از برداشت طریقہ کار پر روشنی ڈالی۔ ڈاکٹر افتخار احمد نے کہا کہ ایک مؤثر اور منظم ویلیو چین فلوریکلچر کے شعبے کو قومی معیشت میں ایک اہم کردار ادا کرنے کے قابل بنا سکتی ہے۔ انہوں نے کہا کہ اس شعبے کو معیاری مقامی بیجوں کی محدود دستیابی، جدید پیداواری اور بعد از برداشت ٹیکنالوجی کی کمی سمیت متعدد چیلنجز کا سامنا ہے۔