دبئی میں نابینا شخص کو سڑک پار کرانیوالے پاکستانی بس ڈرائیور کی ستائش

محمد نعیم عباس کو نابینا شخص کی مدد کرنے اور اسے بحفاظت سڑک پار کرانے پر خصوصی اعزاز سے نوازا گیا

ساجد علی ہفتہ 2 مئی 2026 15:47

دبئی میں نابینا شخص کو سڑک پار کرانیوالے پاکستانی بس ڈرائیور کی ستائش

دبئی (اُردو پوائنٹ اخبارتازہ ترین۔ 02 مئی2026ء) دبئی سے انسانی ہمدردی اور اخلاق کی ایک خوبصورت خبر سامنے آئی ہے جہاں ایک پاکستانی بس ڈرائیور محمد نعیم عباس نے اپنی فرض شناسی اور ہمدردی سے سب کے دل جیت لیے۔ خلیجی میڈیا کے مطابق دبئی کی ایک مصروف سڑک پر پیش آنے والے ہمدردی کے ایک چھوٹے سے واقعے نے شہر کی روح کو خوبصورتی سے اجاگر کر دیا، دبئی کی روڈز اینڈ ٹرانسپورٹ اتھارٹی (RTA) کے ایک پاکستانی بس ڈرائیور محمد نعیم عباس کو ایک نابینا شخص کی مدد کرنے اور اسے بحفاظت سڑک پار کرانے پر خصوصی اعزاز سے نوازا گیا ہے۔

اس حوالے سے وائرل ویڈیو میں دیکھا جاسکتا ہے کہ نعیم عباس محمد نے ایک لمحہ بھی ہچکچاہٹ محسوس نہیں کی، جب انہوں نے ایک شخص کو سڑک کنارے جدوجہد کرتے دیکھا، تو وہ فوراً آگے بڑھے اور ٹریفک کے درمیان سے اس کی رہنمائی کرتے ہوئے اسے بحفاظت دوسری جانب پہنچایا، اس پر نعیم نے سادگی سے کہا کہ "میں نے ایک شخص کو سڑک پار کرنے کی کوشش کرتے دیکھا جو نابینا تھا، بس میں نے اس کی مدد کر دی"۔

(جاری ہے)

View this post on Instagram

آر ٹی اے (RTA) کی جانب سے شیئر کی گئی ایک ویڈیو میں ان کے اس عمل میں چھپی خاموش دیکھ بھال کو دیکھا جا سکتا ہے، اس انسانی جذبے کے اعتراف میں اتھارٹی نے انہیں تعریفی سرٹیفکیٹ سے نوازا، آر ٹی اے کے ڈائریکٹر جنرل مطر الطائر نے نعیم کو سرٹیفکیٹ دیتے ہوئے "شاباش" کہی، نعیم کے لیے یہ کام کسی صلے کا محتاج نہیں تھا، انہوں نے کہا کہ "مجھے لوگوں کی مدد کرنا پسند ہے، مدد کرنا ہی اصل راستہ ہے اور یہی دبئی کی ثقافت ہے"، ان کے یہ الفاظ شیخ حمدان بن محمد بن راشد آل مکتوم کے اس قول کی عکاسی کرتے ہیں کہ "دبئی کی روح اس کے لوگوں میں بستی ہے"۔