مرکزی انجمن محبانِ مصطفیٰ آزادکشمیر کا‘‘سنٹرل بلڈ بنک’’کے قیام کا اعلان

جمعہ 8 مئی 2026 13:38

مظفرآباد(اُردو پوائنٹ اخبارتازہ ترین - این این آئی۔ 08 مئی2026ء) مرکزی انجمن محبانِ مصطفیٰ آزادکشمیر نے مستحق مریضوں اور تھیلیسیمیا سے متاثرہ افراد کی معاونت کے لیے‘‘سنٹرل بلڈ بنک’’کے قیام کا اعلان کر دیا۔بلڈ بنک کے ذریعے ضرورت مند مریضوں کو مفت خون کی فراہمی یقینی بنانے کے لیے انجمن کے کارکنان اور رضاکاران سے رابطوں کی غرض سے ایک خصوصی کمیٹی بھی تشکیل دے دی گئی۔

مرکزی انجمن محبانِ مصطفیٰ آزادکشمیر کی مرکزی باڈی کا اجلاس صدر میاں محمد عتیق جھاگوی کی زیرِ صدارت گوجرہ میں منعقد ہوا۔ اجلاس میں زبیر الٰہی چغتائی، راجہ تنویر مجید، منظور احمد اعوان، شاکر ترک، اویس ترک، وصی احمد شیخ، محمد شبیر کشمیری، اورنگزیب اعوان ایڈووکیٹ، ملک عاصم اعوان، سدھیر اعوان اور دیگر ذمہ داران نے شرکت کی۔

(جاری ہے)

اجلاس میں رضاکاران اور کارکنان کی خدمات کے اعتراف میں 16 مئی 2026ء کو حوصلہ افزائی تقریب منعقد کرنے کا فیصلہ کیا گیا، جس کے انتظامات کے لیے اویس ترک، منظور اعوان، سدھیر اعوان اور شاکر علی ترک پر مشتمل آرگنائزنگ کمیٹی قائم کی گئی۔

مرکزی باڈی کے اجلاس میں محمد شبیر کشمیری کو بلڈ بنک کمیٹی کا انچارج، ملک عاصم کو معاون جبکہ اویس مغل کو ممبر مقرر کیا گیا۔ کمیٹی کو تمام یونٹس کے عہدیداران سے رابطے اور رضاکار ڈونرز کا نیٹ ورک فعال بنانے کی ذمہ داری سونپی گئی ہے۔مرکزی باڈی نے یہ بھی فیصلہ کیا کہ مرکزی درسِ قرآن کا دوبارہ آغاز 13 مئی 2026ء سے کہوڑی میں کیا جائے گا، جبکہ سہ ماہی درسِ قرآن کی تاریخ عیدالاضحیٰ کے بعد باہمی مشاورت سے مقرر کی جائے گی۔

اجلاس میں تنظیمی نظم و ضبط کو مزید مؤثر بنانے کے لیے مسلسل غیر حاضر رہنے والے عہدیداران کی تفصیلات مرکزی گروپ میں شیئر کرنے کی منظوری دی گئی، جس کی ذمہ داری منظور اعوان کو سونپی گئی۔مزید برآں حوصلہ افزائی تقریب میں تمام یونٹس بشمول اسلام آباد یونٹ کے عہدیداران کو مدعو کرنے کا فیصلہ کیا گیا۔ دعوتی کمیٹی میں اویس ترک، راجہ تنویر، منظور اعوان اور زبیر چغتائی شامل ہوں گے۔

اجلاس میں عرس مبارک کے رضاکار کارکنان کی کارکردگی رپورٹ مرتب کرنے، آئین کی طباعت جلد مکمل کرنے اور فلاحی سرگرمیوں کو منظم انداز میں وسعت دینے پر بھی اتفاق کیا گیا۔ اسی سلسلے میں فلاحی فنڈ ممبر شپ کمیٹی اور فلاحی کمیٹی بھی تشکیل دی گئیں۔اجلاس کے اختتام پر امت مسلمہ کے لیے خصوصی دعائیں کی گئیں۔

Facebook Twitter Google + Share on Whatsapp

مرکزی انجمن محبانِ مصطفیٰ آزادکشمیر کا‘‘سنٹرل بلڈ بنک’’کے قیام کا اعلان

متعلقہ عنوان :

مزید کشمیر کی خبریں