ڈاکٹرعافیہ اور ان کی فیملی کے کرب کو اجاگر کرنے کیلئے ’’سلام عافیہ مشاعرہ ‘‘ کا انعقاد

اتوار 24 مئی 2026 19:15

کراچی (اُردو پوائنٹ اخبارتازہ ترین - این این آئی۔ 24 مئی2026ء) قوم کی بیٹی ڈاکٹرعافیہ صدیقی، ان کی فیملی اور قوم کے کرب کو اجاگر کرنے کیلئے عافیہ موومنٹ کے زیراہتمام معروف شاعر انور شعور کی زیرصدارت فاران کلب میں ’’سلام عافیہ مشاعرہ ‘‘ کا انعقاد کیا گیا۔ فاران کلب کے زیر اہتمام ہونے والے مشاعرے میں ملک کے معروف شعراء نے شرکت کی ،جن میں انور شعور ، فراست رضوی، اختر سعیدی، خالد معین، محمود غزنوی، خلیل اللہ فاروقی، اے ایچ خانزادہ، حکیم ناصف، کاشف حسین غائر، سلیم فوز، فرخ اظہار، محترمہ سحر علی، رمزی آثم، عثمان جامعی، نعیم سمیر، محترمہ یاسمین یاس، محترمہ ناہیدعزمی، قاضی دانش صدیقی اور نعیم الدین نعیم شامل تھے۔

شعراء نے اپنے کلام کے ذریعے ڈاکٹر عافیہ کو ان کی استقامت پر خراج تحسین پیش کیا اور جیل میں ان پر تشدد اور حکمرانوں کی بے حسی پر افسوس کا اظہار کیا۔

(جاری ہے)

جس پر حاضرین مجلس نے شعراء کرام کو بھرپور داد سے نوازا۔ دیگر شعراء کے کلام کے علاوہ یاسمین یاس، عثمان جامعی اور انور شعور کے درج ذیل اشعار نے سامعین کی سماعت اور دلوں پر گہرا اثر چھوڑا۔

اس موقع پرابتدائی کلمات اداکرتے ہوئے گلوبل عافیہ موومنٹ کی چیئرپرسن اور ڈاکٹر عافیہ کی ہمشیرہ ڈاکٹر فوزیہ صدیقی نے کہا کہ میں تمام شعراء اور حاضرین مجلس کا تہہ دل سے شکریہ ادا کرتی ہوں جنہوں نے میری بہن عافیہ پر تشدد، ناانصافی اور اس کے اور ہمارے دکھ کو محسوس کیا۔ انہوں نے کہا کہ آپ لوگوں کو مدعو کرنے کا مقصد لوگوں میں ناانصافیوں کے خلاف شعور بیدار کرنا ہے۔ عافیہ کا کیس امریکی عدالت میں دوبارہ کھلنے جارہا ہے، میری درخواست ہے اکابرین کا ضمیر جگایئے۔ڈاکٹر فوزیہ صدیقی نے بے لوث تعاون اور بہترین انتظامات پر فاران کلب کی انتظامیہ کا بھی شکریہ ادا کیا۔