ورلڈ کلائمبنگ سیریز، چین کے چو شوہونگ اور امریکہ کی ایما ہنٹ نے سپیڈ کلائمبنگ کے طلائی تمغے جیت لئے

پیر 1 جون 2026 17:02

میڈرڈ (اُردو پوائنٹ اخبارتازہ ترین - اے پی پی۔ 01 جون2026ء) سپین کے شہر الکوبینڈاس میں منعقدہ ورلڈ کلائمبنگ سیریز کا اختتام ہو گیا ہے، جس کے آخری روز چین کے 19 سالہ چو شوہونگ اور امریکہ کی ایما ہنٹ نے بالترتیب مردوں اور خواتین کے سپیڈ کلائمبنگ کے ٹائٹلز اپنے نام کر لیے ہیں۔شنہوا کے مطابق مردوں کے سنسنی خیز فائنل مقابلے میں چین کے چو شوہونگ نے انڈونیشیا کے 18 سالہ انتاسیافی روبی الہلمی کو شکست دی۔

چو شوہونگ نے مقررہ فاصلہ اپنے کیریئر کے بہترین وقت 4.75 سیکنڈز میں طے کر کے اپنے کیریئر کا دوسرا ورلڈ کلائمبنگ سیریز گولڈ میڈل جیتا۔ چینی ایتھلیٹ کا کہنا تھا کہ وہ اس کامیابی پر بے حد خوش ہیں اور اب ان کی تمام تر توجہ آئندہ ستمبر میں ہونے والے ایشین گیمز میں گولڈ میڈل جیتنے پر مرکوز ہے۔

(جاری ہے)

اسی مقابلے میں چین کے ہی یانگ جی نے امریکہ کے زیک ہیمر کو محض 0.02 سیکنڈز کے فرق سے ہرا کر کانسی کا تمغہ حاصل کیا۔

خواتین کے سپیڈ کلائمبنگ ایونٹ میں امریکہ کی ایما ہنٹ نے شاندار کارکردگی کا مظاہرہ کرتے ہوئے فائنل میں یوکرین کی پولینا خالکیوچ کو شکست دی۔ ایما ہنٹ نے فائنل مقابلے میں 6.08 سیکنڈز کا وقت نکال کر نیا پین امریکن ریکارڈ قائم کیا اور طلائی تمغہ اپنے نام کیا۔ یوکرین کی 18 سالہ پولینا نے چاندی کا تمغہ حاصل کیا جو ان کے کیریئر کا پہلا انٹرنیشنل میڈل ہے۔ خواتین کے اس مقابلے میں بھی کانسی کا تمغہ چین کی زہانگ شاؤقین کے حصے میں آیا۔ 4 روز تک جاری رہنے والے اس ایونٹ کے بولڈر مقابلوں میں جاپان کے سوراٹو انراکو اور برطانیہ کی ایرن میک نیس نے بالترتیب مردوں اور خواتین کے کیٹیگری میں گولڈ میڈلز جیتے۔