ویمن ٹی ٹوئنٹی ورلڈ کپ، انگلینڈ نے سری لنکا کو ہرار دیا

ہفتہ 13 جون 2026 13:58

ْبرمنگھم (اُردو پوائنٹ اخبارتازہ ترین - این این آئی۔ 13 جون2026ء) ویمن ٹی ٹوئنٹی ورلڈ کپ کے افتتاحی میچ میں میزبان انگلینڈ نے سری لنکا کو شکست دے دی، میچ میں انگلینڈ نے پہلے بیٹنگ کرتے ہوئے ایک وکٹ پر 219رنز اسکور کئے، ویاٹ ہوج نے 105رنز کی ناقابل شکست اننگز کھیلی۔برمنگھم میں کھیلے گئے میچ میں انگلینڈ نے پہلے بیٹنگ کی، اوپنر ایمی جونز اور ڈینی ویاٹ ہوج نے شاندار بیٹنگ کا مظاہرہ کرتے ہوئے 135 رنز کی بٴْنیاد رکھی، ایمی جونز 53 رنز بناکر آؤٹ ہوئیں۔

(جاری ہے)

دوسری وکٹ پر ڈینی ویاٹ اور کپتان نیٹ شوائر برنٹ نے حریف بولرز کی ایک نہ چلنے دی اور میدان کے چاروں جانب اسٹروکس کھیلے، خاص طور پر ڈینی ویاٹ نے جارحانہ انداز میں کھیلتے ہوئے 61 گیندوں پر سنچری مکمل کی، وہ 62 گیندوں کا سامنا کرنے کے بعد 13 چوکوں اور ایک چھکے کی مدد سے 105رنز پر ناٹ آؤٹ رہیں، نیٹ شوائر نے 46 رنز بنائے۔انگلینڈ کا اسکور 1 وکٹ پر 219رنز رہا، ہدف کے تعاقب میں سری لنکا کی بیٹرز وقفے وقفے سے پویلین جاتی رہیں، ٹیم اننگز کی آخری گیند پر 132رنز بناکر آؤٹ ہوگئی، نیلاک شیکا سلوا 37 رنز کے ساتھ نمایاں رہیں، فریا کیمپ نے چار، سوفی ایکلسٹیون اور چارلی ڈین نے دو، دو کھلاڑیوں کو آؤٹ کیا۔