کاکروچ جنتاپارٹی مودی کے اقتدار کے لئے خطرہ ،عالمی میڈیا پر تحریک کی گونج

بدھ 10 جون 2026 18:21

دہلی (اُردو پوائنٹ اخبارتازہ ترین - این این آئی۔ 10 جون2026ء) بھارت میں کاکروچ جنتاپارٹی مودی کی زیر قیادت بی جے پی حکومت کے لیے خطرہ بن گئی ہے اور اس تحریک کی گونج اب عالمی میڈیا پر بھی سنائی دینے لگی ہے۔کشمیرمیڈیاسروس کے مطابق سوشل میڈیا سے شروع ہونے والی نوجوانوں کی تحریک دہلی میں عملی احتجاج کے ذریعے مودی حکومت کوسخت دباؤ میں لے آئی ہے۔

برطانوی جریدہ’دی گارڈین‘ نے جین زی تحریک کی طاقت کا اعتراف کرتے ہوئے لکھاکہ کاکروچ جنتا پارٹی وہ تحریک ہے جو بھارت کی سیاست کو ہلادینے کی صلاحیت رکھتی ہے۔ آن لائن میم سے شروع ہونے والی جین زی تحریک مودی حکومت کے لیے غیر متوقع چیلنج بنتی جارہی ہے۔دی گارڈین کے مطابق یہ تحریک لاکھوں ایسے بھارتی نوجوانوں کی آواز بن چکی ہے جوعدم اطمینان اور مایوسی کا شکار ہیں۔

(جاری ہے)

کاکروچ جنتا پارٹی کے بانی ابھیجیت دیپکے نے دہلی میں احتجاج سے خطاب میں کہا تھاکہ بھارت کے نوجوان اب خوفزدہ نہیں ہوں گے، وہ اپنے حقوق کے لیے لڑیں گے۔بھارتی نوجوانوں کو امید ہے کہ نیپال اورسری لنکا کی طرح اب بھارت میں بھی نوجوانوں کی ایک بڑی عوامی تحریک جنم لے رہی ہے۔ماہرین کا کہنا ہے کہ یہ تحریک ثابت کرتی ہے کہ بھارتی نوجوان روایتی سیاست، مذہبی کارڈ اور انتہاپسندانہ نظریات کو مسترد کرچکا ہے۔ بھارت میں جین زی کی منفرد تحریک بے روزگاری، مایوسی اور ریاستی جبر کیخلاف نوجوانوں کے شدید غم و غصے کا عملی اظہار ہے۔