وزیراعلیٰ پنجاب کا گرمی کے پیش نظر عوام کیلئے ٹھنڈے پانی کا اہتمام کرنے کا حکم

جمعرات 11 جون 2026 16:21

لاہور (اُردو پوائنٹ اخبارتازہ ترین - این این آئی۔ 11 جون2026ء) وزیراعلیٰ پنجاب مریم نواز شریف نے شدید گرمی اور ہیٹ ویو کے پیش نظر عوام کو ریلیف فراہم کرنے کیلئے متعلقہ اداروں اور ضلعی انتظامیہ کو خصوصی ہدایات جاری کر دی ہیں۔وزیراعلیٰ نے ہدایت کی ہے کہ ہر شہر کے اہم چوک چوراہوں، عوامی مقامات اور بازاروں میں سائے اور شیڈز کا انتظام کیا جائے تاکہ شہریوں کو گرمی کی شدت سے تحفظ فراہم کیا جا سکے۔

انہوں نے تمام ویگن اسٹینڈز، بس ٹرمینلز اور ریلوے اسٹیشنز پر ٹھنڈے پانی، پنکھوں اور ایئر کولرز کی دستیابی یقینی بنانے کا حکم دیا ہے۔ سرکاری دفاتر میں آنے والے شہریوں کو بھی ٹھنڈا پانی فراہم کرنے کی ہدایت کی گئی ہے۔وزیراعلیٰ مریم نواز نے شہریوں سے اپیل کی ہے کہ شدید گرمی اور لو کے دوران بلا ضرورت گھروں سے باہر نکلنے سے گریز کریں، جبکہ خواتین، بزرگوں اور بچوں کا خصوصی خیال رکھا جائے۔

(جاری ہے)

تعلیمی اداروں میں جاری سمر کیمپس کے حوالے سے بھی ہدایات جاری کی گئی ہیں کہ طلبہ اور اساتذہ کیلئے ٹھنڈے پانی، پنکھوں اور ایئر کولرز کا مناسب انتظام یقینی بنایا جائے۔مزید برآں، ٹریفک پولیس کو ہدایت کی گئی ہے کہ شدید دھوپ میں موٹر سائیکل سواروں کو بلا ضرورت نہ روکا جائے۔ خاص طور پر اگر موٹر سائیکل پر فیملی یا بچے سوار ہوں تو انہیں دھوپ میں کھڑا کرنے سے گریز کیا جائے۔