Live Updates

عوام پر مہنگائی کا نیا وار؛ پیکٹ والے دودھ، گھی، تیل اور بچوں کے فارمولا ملک پر ٹیکسوں کی بھرمار

بجٹ میں دودھ سے بنی مصنوعات، مٹھائیاں، پاستا اور ساسز بھی مہنگی کرنے کی سفارش کردی گئی، زرعی ادویات، پلاسٹک کی گھریلو اشیاء، بیگ، سوٹ کیس، ہینڈ بیگ، باتھ روم فٹنگز، سینٹری ویئر، کراکری پر بھی ٹیکس

ساجد علی ہفتہ 13 جون 2026 11:25

عوام پر مہنگائی کا نیا وار؛ پیکٹ والے دودھ، گھی، تیل اور بچوں کے فارمولا ..

اسلام آباد (اُردو پوائنٹ اخبارتازہ ترین۔ 13 جون2026ء) وفاقی حکومت نے آئندہ مالی سال کے بجٹ میں ٹیکس وصولیوں کا ہدف پورا کرنے کے لیے ریٹیل پیکنگ میں بکنے والی تقریباً تمام گھریلو اور تجارتی اشیاء پر سیلز ٹیکس عائد کرنے کی تجاویز پیش کردیں، کچن کے راشن، بچوں کی خوراک، زرعی ادویات، سفری سامان، واش روم فٹنگز اور آٹو موبائل سمیت ہر شعبے پر ٹیکس لگے گا۔

میڈیا رپورٹس کے مطابق جو اشیاء اب 18 فیصد جنرل سیلز ٹیکس یعنی جی ایس ٹی کی زد میں آ رہی ہیں، ان میں ریٹیل پیکنگ میں فروخت ہونے والا عام دودھ، معصوم بچوں کا فارمولا ملک اور دودھ سے تیار کردہ دیگر تمام مصنوعات مکھن، پنیر وغیرہ، گھی، خوردنی تیل، مٹھائیاں، پاستا، نوڈلز اور مختلف قسم کے ساسز کیچپ وغیرہ شامل ہیں، نا صرف کھانے پینے کی اشیاء بلکہ زراعت اور گھر کے استعمال کا دیگر سامان بھی مہنگا کرنے کی سفارش کی گئی ہے۔

(جاری ہے)

بتایا گیا ہے کہ ریٹیل پیکنگ میں فروخت ہونے والی تمام زرعی ادویات اور جراثیم کش مصنوعات پر 18 فیصد جی ایس ٹی لاگو ہوگا، پلاسٹک کی گھریلو اشیاء، کچن ویئر، اسٹوریج بکس، کراکری اور روزمرہ استعمال کے دیگر برتنوں پر بھی سیلز ٹیکس وصول کیا جائے گا، بازار میں بکنے والے تمام اقسام کے جوتے اب ٹیکس کے دائرہ کار میں ہوں گے، اس کے علاوہ سفری بیگ، سوٹ کیس، ہینڈ بیگ اور دیگر سفری لوازمات کو بھی مہنگا کر دیا گیا۔

گھر کی تعمیر یا مرمت کرنے والے شہریوں کے لیے بھی بری خبر ہے کہ باتھ روم کی فٹنگز، سینٹری ویئر اور واش روم کے استعمال کے تمام سامان پر ٹیکس عائد کرنے کی تجاویز ہیں، اسی طرح ڈسٹری بیوٹرز پر ٹیکس کی شرح 0.25 فیصد سے بڑھا کر 0.50 فیصد کرنے کی سفارش ہے، جبکہ خام مال درآمد کرکے مقامی مارکیٹ میں بیچنے والے کمرشل امپورٹرز پر 3 فیصد نیا ٹیکس لگایا جائے گا۔