ٹینس کھلاڑی محمد ابراہیم حسین گل نے اے ٹی ایف ٹینس ٹورنامنٹ میں ڈبلز کا ٹائٹل اپنے نام کر لیا

ہفتہ 20 جون 2026 17:58

لاہور (اُردو پوائنٹ اخبارتازہ ترین - اے پی پی۔ 20 جون2026ء) پاکستان کے ابھرتے ہوئے جونیئر ٹینس کھلاڑی محمد ابراہیم حسین گل نے ازبکستان کے شہر تاشقند میں منعقد ہونے والے اے ٹی ایف 12 اینڈر ٹینس ٹورنامنٹ میں شاندار کارکردگی کا مظاہرہ کرتے ہوئے ڈبلز کا ٹائٹل اپنے نام کر لیا جبکہ سنگلز مقابلے میں وہ رنر اپ رہے۔ترجمان کے مطابق ڈبلز کے فائنل میں محمد ابراہیم حسین گل نے ازبکستان کے ایک کھلاڑی کے ساتھ شراکت کی اور ٹائٹل جیتا۔

(جاری ہے)

انہوں نے پہلا سیٹ چھ چار سے اپنے نام کیا، تاہم دوسرے سیٹ میں ان کے حریف انجری کے باعث میچ سے دستبردار ہو گئے جس کے بعد یہ جوڑی فاتح قرار پائی۔اس سے قبل سنگلز فائنل میں محمد ابراہیم حسین گل کو ازبکستان کے آندرے واحدوف کے ہاتھوں تین چھ اور پانچ سات سے شکست کا سامنا کرنا پڑا اور وہ رنر اپ رہے۔پاکستان ٹینس فیڈریشن کے صدر اعصام الحق قریشی،سیکریٹری جنرل کرنل ضیا الدین طفیل اور پی ٹی ایف کی انتظامیہ نے محمد ابراہیم حسین گل کو اس بین الاقوامی کامیابی پر مبارکباد دی اور ان کے مستقبل کے مقابلوں کیلئے نیک خواہشات کا اظہار کیا۔انہوں نے پاکستان کے نوجوان ٹینس ٹیلنٹ کی ترقی اور معاونت میں اہم کردار ادا کرنے پر بی اے آر ڈی فائونڈیشن کی بھی خصوصی تعریف کی۔