کالام میں جھیل سیف اللہ کشتی حادثے کی تحقیقات کیلئے کمیٹی قائم

جمعہ 3 جولائی 2026 19:50

پشاور(اُردو پوائنٹ اخبارتازہ ترین - این این آئی۔ 03 جولائی2026ء) خیبر پختونخوا حکومت نے کالام میں جھیل سیف اللہ کشتی واقعے کی تحقیقات کے لیے دو رکنی انکوائری کمیٹی قائم کردی۔خیبرپختونخوا حکومت نے کمیٹی کے قیام کا نوٹیفکیشن جاری کردیا جس کے مطابق اسپیشل سیکرٹری بین الصوبائی رابطہ محمد ایاز کو انکوائری کمیٹی کا سربراہ مقرر کیا گیا ہے جب کہ اسپیشل سیکرٹری خزانہ زبیر احمد کمیٹی کے رکن ہوں گے۔

نوٹیفکیشن کے مطابق کمیٹی کشتی حادثے کے تمام حقائق، واقعات کی ترتیب اور حادثے کی بنیادی وجوہات کا تفصیلی تعین کرے گی، کمیٹی کشتی کی تکنیکی حالت، حادثے کے وقت موسم، آپریشنل صورتحال اور دیگر متعلقہ عوامل کا بھی جائزہ لے گی۔انکوائری کمیٹی تحقیقات کرے گی کہ آیا کشتی آپریشن متعلقہ قوانین، اجازت ناموں اور حفاظتی تقاضوں کے مطابق کیا جا رہا تھا یا نہیں۔

(جاری ہے)

اس کے علاوہ کشتی چلانے والے کے لائسنس، اہلیت اور قانونی اجازت سے متعلق تمام پہلوؤں کا بھی جائزہ لیا جائے گا۔نوٹیفکیشن کے مطابق حادثے کے وقت لائف جیکٹس، ریسکیو سامان اور دیگر حفاظتی انتظامات کی دستیابی اور مؤثر استعمال کا بھی تفصیلی جائزہ لیا جائے گا،کمیٹی انتظامی، قانونی اور ریگولیٹری خامیوں کی نشاندہی کرتے ہوئے ان کے تدارک کے لیے اصلاحی اقدامات تجویز کرے گی جبکہ مستقبل میں سیاحتی اور تفریحی مقامات پر ایسے حادثات کی روک تھام کے لیے جامع سفارشات بھی پیش کرے گی۔صوبائی حکومت نے انکوائری کمیٹی کو ہدایت کی ہے کہ وہ اپنی مکمل رپورٹ 7 روز کے اندر حکومت کو پیش کرے۔