فیفا ورلڈکپ: پری کوارٹر فائنل میں شکست کے بعد برازیل کے اسٹار کھلاڑی نیمار کا ریٹائرمنٹ کا اعلان

پری کوارٹر فائنل میچ میں ناروے نے 5 بار کی عالمی چیمپئن برازیل کو شکست دے کر ایونٹ سے باہر کر دیا اور کوارٹر فائنل میں جگہ بنالی

ذیشان مہتاب پیر 6 جولائی 2026 10:32

فیفا ورلڈکپ: پری کوارٹر فائنل میں شکست کے بعد برازیل کے اسٹار کھلاڑی ..

نیو جرسی (اردو پوائنٹ تازہ ترین اخبار ۔ 6 جولائی 2026ء ) فیفا ورلڈکپ 2026ء کے پری کوارٹر فائنل میچ میں ناروے کے ہاتھوں شکست کی وجہ سے ورلڈکپ سے باہر ہونے کے بعد برازیل کے اسٹار کھلاڑی نیمار نے ریٹائرمنٹ کا اعلان کر دیا۔

فیفا ورلڈ کپ 2026ء کے پری کوارٹر فائنل میچ میں ناروے نے 5 بار کی عالمی چیمپئن برازیل کو شکست دے کر ایونٹ سے باہر کر دیا اور کوارٹر فائنل میں جگہ بنالی۔

نیو جرسی میں کھیلے گئے میچ میں ناروے نے برازیل کو ایک کے مقابلے میں 2 گول سے ہرا دیا۔ میچ میں ناروے کی جانب سے دونوں گول ایرلنگ ہالینڈ نے اسکور کیے۔

پہلا گول ایرلنگ ہالینڈ نے 79ویں منٹ میں اسکور کیا جبکہ دوسرا گول بھی ایرلنگ ہالینڈ نے 90 منٹ میں کیا۔

برازیل کی جانب سے واحد گول میچ کے اختتامی وقت پر نیمار جونیئر نے پنالٹی کک پر اسکور کیا۔

(جاری ہے)

یوں ناروے 5 بار کی عالمی چیمپئن برازیل کو 1-2 سے شکست دے کر میگا ایونٹ کی تاریخ میں پہلی مرتبہ کوارٹر فائنل میں پہنچ گئی اور برازیل کا سفر اختتام پذیر ہوگیا۔

اس شکست کے بعد ورلڈکپ جیتنے کا خواب ٹوٹنے پر برازیل کے اسٹار کھلاڑی نیمار رو پڑے اور انہوں نے انٹرنیشنل فٹبال سے ریٹائرمنٹ کا اعلان کر دیا۔

غیر ملکی میڈیا کی رپورٹ کے مطابق ناروے سے شکست کے بعد برازیلین صحافی سے گفتگو میں نیمار نے کہا کہ 'میں نے پوری کوشش کی، یہ سب یہاں اسی اسٹیڈیم میں شروع ہوا تھا اور میں نے یہیں اس کا اختتام کیا۔

اب یہ سب ختم ہو چکا ہے'۔

Neymar has announced his retirement from international duty for Brazil. 🇧🇷 pic.twitter.com/vV9PjUAFLP
— FOX Sports (@FOXSports) July 5, 2026

واضح رہے کہ 34 سالہ نیمار نے برازیل کے لیے اپنا پہلا میچ 10 اگست 2010ء کو کھیلا، جو امریکا کے خلاف ایک دوستانہ میچ تھا۔ یہ میچ ایسٹ ردرفورڈ، نیو جرسی کے اسٹیڈیم میں ہی کھیلا گیا تھا۔

نیمار اپنے بین الاقوامی کیریئر کا اختتام برازیل کے سب سے زیادہ گول کرنے والے کھلاڑی کے طور پر کریں گے، جن کے 80 گول ہیں، جو لیجنڈری کھلاڑی پیلے سے 3 گول زیادہ ہیں۔