لوگ میسج کرکے پوچھ رہے ہیں آپ زندہ ہیں؟ وسیم اکرم کا اپنی موت کی خبروں پر دلچسپ ردعمل

جن لوگوں نے مشہور کرکٹرز کو لیکر میری موت کی افواہیں پھیلانے کیلئے جعلی ویڈیوز بنائی ہیں، انہیں بھی بڑی محنت کرنی پڑی ہوگی : سابق کپتان

ذیشان مہتاب منگل 7 جولائی 2026 12:26

لوگ میسج کرکے پوچھ رہے ہیں آپ زندہ ہیں؟ وسیم اکرم کا اپنی موت کی خبروں ..

لاہور (اردو پوائنٹ تازہ ترین اخبار ۔ 7 جولائی 2026ء ) سوئنگ کا سلطان کے نام سے مشہور سابق کپتان وسیم اکرم نے سوشل میڈیا پر گردش کرنے والی اپنی موت کی افواہوں پر دلچسپ ردِعمل دیا ہے۔

60 سالہ وسیم اکرم نے انسٹاگرام پر اپنی ایک نئی ویڈیو شیئر کی جس میں انہوں نے بڑے دلچسپ انداز میں اپنی موت کی خبروں کی تردید کی ہے۔

انہوں نے کہا کہ مجھے امید ہے سب لوگ ٹھیک ٹھاک ہیں، میرا آپ لوگوں سے یہ سوال ہے کہ پچھلے کچھ دنوں سے میری موت کے بارے میں سوشل میڈیا پر جعلی افواہیں گردش کررہی ہیں، اب اگر آپ لوگوں کو آج کے جدید دور میں جعلی خبروں کی سمجھ نہیں ہے تو ہم 60 سال کے بابے کس کھیت کی مولی ہیں۔

سابق کرکٹر نے کہا کہ ان لوگوں کو 21 توپوں کی سلامی جو سوشل میڈیا پر مجھے میسج کرکے پوچھ رہے ہیں کہ آپ زندہ ہیں؟

اُنہوں نے طنزیہ انداز میں کہا کہ نہیں میں مرنے کے بعد یہ ویڈیو بنا رہا ہوں، جن لوگوں نے مشہور کرکٹرز کو لے کر میری موت کی افواہیں پھیلانے کے لیے جعلی ویڈیوز بنائی ہیں، انہیں بھی بڑی محنت کرنی پڑی ہوگی، اگر اتنا دماغ کسی اچھے کام میں لگائیں تو بڑی کامیابیاں حاصل کریں۔

(جاری ہے)

وسیم اکرم کا کہنا تھا کہ پنجابی میں ایک مشہور کہاوت ہے کہ گدھے کے اوپر کتابیں لادنے سے وہ عالم نہیں بن جاتا کیونکہ اس کے لیے پڑھنا پڑتا ہے اور نقل کے لیے بھی عقل کی ضرورت ہے‘۔

View this post on Instagram

اس سے قبل شنیرا نے بھی سوشل میڈیا پر ایک نئی ویڈیو شیئر کی جس میں وسیم اکرم جم میں ورزش کرتے ہوئے نظر آرہے ہیں۔

شنیرا اکرم نے ویڈیو کے ساتھ لکھا کہ یہ ریکارڈنگ میں نے سوشل میڈیا پر پھیلنے والی جعلی خبروں اور AI ویڈیوز کے جواب میں شیئر کی ہے۔

انہوں نے لکھا کہ جیسا کہ آپ دیکھ سکتے ہیں، وہ جم میں ہیں اور بالکل خیریت سے ہیں۔

شنیرا اکرم کی اس ویڈیو کے بعد مداحوں نے اطمینان کا اظہار کیا اور واضح ہو گیا کہ وسیم اکرم خیریت سے ہیں۔

Facebook Twitter Google + Share on Whatsapp

لوگ میسج کرکے پوچھ رہے ہیں آپ زندہ ہیں؟ وسیم اکرم کا اپنی موت کی خبروں پر دلچسپ ردعمل

جن لوگوں نے مشہور کرکٹرز کو لیکر میری موت کی افواہیں پھیلانے کیلئے جعلی ویڈیوز بنائی ہیں، انہیں بھی بڑی محنت کرنی پڑی ہوگی : سابق کپتان

متعلقہ عنوان :

مزید کھیلوں کی خبریں