دنیا بھر میں ورلڈ چاکلیٹ ڈے منایا گیا

منگل 7 جولائی 2026 18:32

لاہور (اُردو پوائنٹ اخبارتازہ ترین - این این آئی۔ 07 جولائی2026ء) دنیا بھر میں گزشتہ روز ورلڈ چاکلیٹ ڈے منایا گیا ۔ہر سال 7جولائی کو دنیا بھر میں چاکلیٹ ڈے منایا جاتا ہے، یہ دن چاکلیٹ کی دلچسپ تاریخ، اس کی ثقافتی اہمیت، معاشی کردار اور دنیا بھر میں اس کی غیر معمولی مقبولیت کو اجاگر کرنے کیلئے مخصوص ہے۔7جولائی کو ورلڈ چاکلیٹ ڈے منانے کی روایت کے بارے میں مختلف آراء پائی جاتی ہیں، کچھ لوگ سمجھتے ہیں کہ اس دن 1550 میں چاکلیٹ یورپ میں متعارف ہوئی تھی تاہم چاکلیٹ کے عالمی دن کا انعقاد 2009ء سے شروع ہوا اور اب یہ دنیا کے متعدد ممالک میں جوش و خروش سے منایا جاتا ہے، چاکلیٹ صرف ایک میٹھی غذا نہیں بلکہ خوشی، محبت، دوستی اور جشن کی علامت بھی بن چکی ہے۔

چاکلیٹ ڈے کے موقع پر مختلف ممالک میں چاکلیٹ فیسٹیول، نمائشیں، کوکنگ مقابلے اور خصوصی تقریبات منعقد کی جاتی ہیں، چاکلیٹ بنانے والی کمپنیاں نئی مصنوعات متعارف کراتی ہیں اور صارفین کیلئے خصوصی رعایتوں کا اعلان بھی کرتی ہیں۔

(جاری ہے)

سوشل میڈیا پر بھی لوگ اپنی پسندیدہ چاکلیٹس، گھریلو ترکیبیں اور تصاویر شیئر کر کے اس دن کی خوشیوں میں شریک ہوتے ہیں، پاکستان میں بھی چاکلیٹ کی مقبولیت مسلسل بڑھ رہی ہے، مقامی اور بین الاقوامی برانڈز کی مصنوعات ہر بڑے شہر میں آسانی سے دستیاب ہیں جبکہ بیکریوں، کیفیز اور گھروں میں چاکلیٹ سے تیار کردہ کیک، براونیز، ڈیزرٹس اور دیگر اشیا کی مانگ میں اضافہ دیکھنے میں آ رہا ہے۔

چاکلیٹ بلاشبہ ذائقے، خوشی، تہذیب اور انسانوں کو قریب لانے والی ایک ایسی مشترکہ زبان ہے جسے دنیا بھر میں یکساں محبت سے سمجھا جاتا ہے۔