ؤپی ٹی آئی کا 5 اگست کو ملک گیر احتجاجی ریلیوں کا اعلان، اپوزیشن جماعتوں سے مشاورت کا فیصلہ

)بانی پی ٹی آئی کی قید کے تین سال مکمل ہونے پر احتجاجی تحریک تیز کرنے کا عندیہ، بیرسٹر گوہر کی حکومت پر تنقید

بدھ 15 جولائی 2026 22:25

ج*اسلام آباد(اُردو پوائنٹ اخبارتازہ ترین - آن لائن۔ 15 جولائی2026ء) پاکستان تحریک انصاف (پی ٹی آئی) کی مرکزی قیادت نے 5 اگست کو بانی پی ٹی آئی کی قید کے تین سال مکمل ہونے کے موقع پر ملک بھر میں احتجاجی ریلیاں نکالنے کا اعلان کرتے ہوئے کہا ہے کہ اس حوالے سے اپوزیشن جماعتوں کے ساتھ مشاورت کے بعد آئندہ کا لائحہ عمل طے کیا جائے گا۔اسلام آباد میں پی ٹی آئی رہنماؤں کی مشترکہ پریس کانفرنس سے خطاب کرتے ہوئے پارٹی چیئرمین بیرسٹر گوہر نے کہا کہ پارلیمانی پارٹی کے اجلاس میں بانی پی ٹی آئی اور بشریٰ بی بی کی صحت سمیت مختلف اہم سیاسی معاملات پر تفصیلی گفتگو کی گئی۔

انہوں نے کہا کہ 5 اگست کو بانی پی ٹی آئی کی قید کو تین سال مکمل ہو جائیں گے، جس کے موقع پر ملک بھر میں احتجاجی ریلیاں اور دیگر سیاسی سرگرمیاں منعقد کی جائیں گی۔

(جاری ہے)

بیرسٹر گوہر کا کہنا تھا کہ بانی پی ٹی آئی کو عدالتوں سے انصاف نہیں مل رہا اور گزشتہ تین برس کے دوران انہیں انصاف کی فراہمی میں مسلسل رکاوٹیں سامنے آتی رہی ہیں۔ انہوں نے کہا کہ ملک میں قانون کی بالادستی، انصاف کی فراہمی اور سیاسی استحکام وقت کی اہم ضرورت ہے، جبکہ ظلم اور ناانصافی کا خاتمہ ہونا چاہیے۔

انہوں نے مزید بتایا کہ 5 اگست کے حوالے سے اپوزیشن لیڈر محمود خان اچکزئی اور مجلس وحدت مسلمین کے سربراہ علامہ ناصر عباس جعفری سے بھی مشاورت کی جائے گی تاکہ مشترکہ حکمت عملی اختیار کی جا سکے۔پی ٹی آئی چیئرمین نے کہا کہ گزشتہ 16 ماہ کے دوران مختلف مقدمات میں سنائے گئے فیصلوں کو اب تین سال مکمل ہونے جا رہے ہیں، تاہم پارٹی اپنی سیاسی جدوجہد آئین اور قانون کے دائرے میں رہتے ہوئے جاری رکھے گی۔پریس کانفرنس میں پی ٹی آئی قیادت نے اس عزم کا اظہار کیا کہ تمام سیاسی معاملات پر آئندہ کا لائحہ عمل باہمی مشاورت سے طے کیا جائے گا، جبکہ 5 اگست کے حوالے سے احتجاجی سرگرمیوں اور تنظیمی تیاریوں کو مزید تیز کرنے کا فیصلہ بھی کیا گیا