اے این ایف کا منشیات اسمگلنگ کیخلاف کریک ڈائون جاری ،خاتون سمیت 6ملزمان گرفتار

کارروائیوں کے دوران 53لاکھ روپے سے زائد مالیت کی 28.988کلوگرام منشیات برآمد کر لی گئی ‘ ترجمان

ہفتہ 18 جولائی 2026 17:20

لاہور (اُردو پوائنٹ اخبارتازہ ترین - این این آئی۔ 18 جولائی2026ء) اینٹی نارکوٹکس فورس کی جانب سے ملک کے مختلف شہروں میں منشیات اسمگلنگ کے خلاف کریک ڈائون جاری ہے ، 8کاروائیوں کے دوران خاتون سمیت 6ملزمان گرفتار کر کے 53لاکھ روپے سے زائد مالیت کی 28.988کلوگرام منشیات برآمد کر لی گئی ۔

(جاری ہے)

ترجمان اے این ایف کے مطابق اسلام آبادایئر پورٹ پر ریاض جانے والے مسافر کے بیگ سے 1کلو گرام زینیکس گولیاں برآمد، سیالکوٹ ائر پورٹ پر جدہ جانے والے مسافر کے بیگ سے 940گرام آئس برآمد کر کے ملزم گرفتار ، لاہور ایئر پورٹ پر جدہ جانیوالے مرد اور خاتون کے پیٹ سے 753گرام وزنی 125ہیروئن بھرے کیپسول برآمد، اسلام آباد ایئرپورٹ کے کارگو شیڈ میں دبئی جانے والے پارسل میں پیپر شیٹ میں جذب 995 گرام آئس برآمد ، ای سٹیٹ ایونیو روڈ کراچی کے قریب ملزم سے 12کلوگرام چرس برآمد ، جی ٹی روڈ پشاور کے قریب ملزم کے قبضے سے 1.2کلوگرام چرس برآمد ، سمی ڈسٹرکٹ کیچ کے قریب جھاڑیوں سے 10کلوگرام آئس برآمد اور رنگ روڈ پشاور پر واقع کوریئر آفس میں2پرفیوم باکسز سے 1.2کلو چرس،900گرام افیون برآمد کی گئی ۔

کاروائیوں کا انسداد منشیات ایکٹ 1997ء کے تحت مقدمات درج کر کے تحقیقات کا آغاز کر دیا گیا ہے۔