بینک الفلاح نے کراچی میں نئی ریٹیل کمپریمیئر برانچ کا افتتاح کر دیا

پیر 20 جولائی 2026 21:40

کراچی(اُردو پوائنٹ اخبارتازہ ترین - این این آئی۔ 20 جولائی2026ء) بینک الفلاح نے کراچی کے علاقے خیابانِ شمشیر میں اپنی 1,200ویں برانچ کا افتتاح کر دیا، جو ملک بھر میں بینک کے توسیعی سفر کا ایک اہم سنگِ میل ہے۔نئی ریٹیل کمپریمیئر برانچ روایتی اور ڈیجیٹل بینکاری کی جدید سہولیات فراہم کرتی ہے، جبکہ ممتاز صارفین کے لیے خصوصی پریمیئر بینکنگ لاؤنج بھی قائم کیا گیا ہے۔

اس برانچ میں جدید انفراسٹرکچر، ڈیجیٹل سیلف سروس سہولیات اور مخصوص ریلیشن شپ منیجرز موجود ہیں، تاکہ صارفین کو ذاتی نوعیت کی، آسان اور معیاری بینکاری خدمات فراہم کی جا سکیں۔اس موقع پر بینک الفلاح کے صدر اور چیف ایگزیکٹو آفیسر عاطف باجوہ نے کہاکہ یہ سنگ میل لاکھوں صارفین کے اعتماد کا مظہر ہے۔

(جاری ہے)

اگرچہ ڈیجیٹل بینکاری تیزی سے فروغ پا رہی ہے، تاہم اہم مقامات پر قائم برانچیں ذاتی نوعیت کی خدمات اور صارفین کے ساتھ مضبوط تعلقات کے لیے بدستور ناگزیر ہیں۔

''بینک الفلاح کی گروپ ہیڈ، ریٹیل بینکنگ مہریں احمد نے کہا:''ہم اپنے 90 لاکھ صارفین کے اعتماد کا جشن منا رہے ہیں۔ یہ نئی برانچ مالی شمولیت کے فروغ اور اپنی ایوارڈ یافتہ خدمات کو پاکستان بھر کے مزید لوگوں تک پہنچانے کے ہمارے عزم کی عکاسی کرتی ہے۔''بینک الفلاح اس وقت ملک بھر میں 1,200 برانچوں، 17,000 سے زائد ملازمین اور 4 ممالک میں بین الاقوامی موجودگی کے ساتھ اپنے صارفین کو جدید ،محفوظ اور معیاری بینکاری خدمات کی فراہمی کیلئے پرعزم ہے۔