Live Updates

ٹرمپ کی اے آئی تصاویر کیساتھ ایران کو نئی دھمکیاں

پیر 27 جولائی 2026 22:04

واشنگٹن (اُردو پوائنٹ اخبارتازہ ترین - این این آئی۔ 27 جولائی2026ء) امریکی صدر ڈونلڈ ٹرمپ نے ایرانی آئل ٹینکر کی ضبطی اور خارگ آئل ٹرمینل پر حملے سمیت مصنوعی ذہانت (اے آئی)سے تیار کردہ متعدد تصاویر شیئر کر دیں۔امریکی صدر نے اپنے سوشل میڈیا پلیٹ فارم ٹروتھ سوشل پر مختلف اے آئی تصاویر شیئر کی ہیں، جن میں سے 4 تصاویر کے کیپشن میں لکھا تھا کہ اب یہ ہمارا آئل ٹینکر ہے، جبکہ تصاویر میں ٹرمپ ایک بظاہر ایرانی آئل ٹینکر پر امریکی پرچم لہراتے کھڑے نظر آتے ہیں۔

ایک تصویر میں امریکی فوجیوں کو بھی دکھایا گیا ہے، جبکہ دوسری میں فوجیوں کے ساتھ ایسے کردار بھی شامل ہیں جو بظاہر ایرانی مذہبی رہنماں کی عکاسی کرتے ہیں، جو جہاز سے چھلانگ لگا دیتے ہیں۔بعد ازاں صدر ٹرمپ نے ایک اور تصویر شیئر کی، جس کے ساتھ نو مور انجنز کا کیپشن درج تھا، اس اے آئی تصویر میں ایک ایرانی جہاز کو دھماکے سے تباہ ہوتے ہوئے دکھایا گیا ہے۔

(جاری ہے)

بعض تصاویر میں امریکی صدر نے خود کو اور امریکا کو دنیا کا محافظ قرار دیا ہے جو دنیا کو ایران سے بچانے میں مصروف ہے۔ایک علیحدہ پوسٹ میں ٹرمپ نے خارگ پر حملے کے کیپشن کے ساتھ ایک اور اے آئی سے تیار کردہ تصویر شیئر کی، جس میں لڑاکا طیاروں کو بظاہر ایران کے خارگ آئل ایکسپورٹ ٹرمینل کو نشانہ بناتے ہوئے دکھایا گیا ہے۔خارگ آئل ٹرمینل ایران کی خام تیل کی برآمدات کا ایک اہم مرکز ہے، اسے ایک اہم اسٹریٹجک تنصیب تصور کیا جاتا ہے۔

اس تنصیب پر حملے کی دھمکی آمیز منظر کشی کرنے والی تصویر خطے میں مزید کشیدگی کے امکان کی نشاندہی کرتی ہے۔یہ تصاویر ایسے وقت میں سامنے آئی ہیں جب امریکا اور ایران کے درمیان کشیدگی برقرار ہے، جس کا تعلق خطے میں جاری سمندری کارروائیوں اور عسکری سرگرمیوں سے ہے۔اس سے قبل بھی ڈونلڈ ٹرمپ اس تنازع کے دوران ایرانی تنصیبات کے خلاف دیگر فوجی کارروائیوں کی عکاسی کرنے والی اے آئی سے تیار کردہ تصاویر شیئر کر چکے ہیں۔