ڈی آئی خان، شاہ عالم موڑ پر دہشت گردوں کا حملہ، اے ایس آئی سمیت دو پولیس اہلکار شہید

جمعہ 31 جولائی 2026 19:45

ڈی آئی خان (اُردو پوائنٹ اخبارتازہ ترین - این این آئی۔ 31 جولائی2026ء) ڈیرہ اسماعیل خان کی تحصیل درابن میں شاہ عالم موڑ کے قریب دہشت گردوں کے حملے میں اے ایس آئی سمیت دو پولیس اہلکار شہید ہوگئے، جبکہ ایک دوسرے واقعے میں درابن پولیس کی اے پی سی پر فائرنگ کی گئی، تاہم اس حملے میں کوئی جانی نقصان نہیں ہوا۔پولیس ذرائع کے مطابق تھانہ چودھوان کی حدود میں شاہ عالم موڑ کے قریب موٹرسائیکل پر سوار چار پولیس اہلکار معمول کی ڈیوٹی پر جا رہے تھے کہ دہشت گردوں نے اچانک ان پر فائرنگ کر دی۔

حملے کے نتیجے میں اے ایس آئی فقیر محمد، سکنہ جھوک سکندر پروآ، اور ہیڈ کانسٹیبل وزیر خان موقع پر شہید ہوگئے، جبکہ دیگر اہلکار محفوظ رہے۔واقعے کی اطلاع ملتے ہی اہلِ علاقہ بھی پولیس کی مدد کے لیے جائے وقوعہ پر پہنچ گئے، تاہم حملہ آور فائرنگ کے بعد فرار ہونے میں کامیاب ہوگئے۔

(جاری ہے)

دوسرے واقعے میں ایس ایچ او تھانہ چودھوان پولیس نفری کے ہمراہ جبکہ تھانہ درابن کے اے پی سی انچارج عابد حسین اپنی نفری کے ساتھ درازندہ موڑ پر احتجاج ختم ہونے کے بعد واپس آ رہے تھے کہ دہشت گردوں نے اے پی سی کو نشانہ بنا کر فائرنگ کر دی۔

پولیس کی فوری جوابی کارروائی کے بعد حملہ آور فرار ہوگئے۔ اس حملے میں کوئی جانی نقصان نہیں ہوا۔دونوں واقعات کے بعد پولیس اور سیکیورٹی فورسز کی بھاری نفری موقع پر پہنچ گئی اور علاقے کو گھیرے میں لے کر دہشت گردوں کی تلاش کے لیے سرچ آپریشن شروع کر دیا گیا ہے۔