سیالان پونچھ کے شہداء کو 28ویں یوم شہادت پرشاندار خراج عقیدت

پیر 3 اگست 2026 21:04

اسلام آباد(اُردو پوائنٹ اخبارتازہ ترین - این این آئی۔ 03 اگست2026ء) کل جماعتی حریت کانفرنس کی آزاد جموں و کشمیر شاخ نے سیالان پونچھ قتل عام کے شہداء کو ان کی28 ویں یوم شہادت پرشاندار خراج عقیدت پیش کیا ہے۔کشمیرمیڈیاسروس کے مطابق کل جماعتی حریت کانفرنس کی آزاد جموں و کشمیر شاخ نے آج اسلام آباد میں اپنے دفتر میں سیالان کے شہداء کو خراج عقیدت پیش کرنے کے لیے ایک سیمینار کا انعقاد کیا جس کی صدارت کنوینر غلام محمد صفی نے کی۔

بھارتی فوجیوںنے 3 اور 4 اگست 1998 کی درمیانی شب ضلع پونچھ میں سرنکوٹ کے علاقے سیالان میں شہید امتیاز احمد شیخ جسے میجر گل کے نام سے جانا جاتا ہے، کے خاندان کے 19 افراد کو شہید کیاتھا۔شہداء میں لسہ شیخ، احمد دین شیخ اور حسن محمد کے خاندانوں کے مرد، خواتین اور بچے شامل ہیں۔

(جاری ہے)

حریت رہنماؤں نے سیمینار سے خطاب کرتے ہوئے افسوس کا اظہار کیا کہ شہداء کے اہل خانہ 28 سال بعد بھی انصاف سے محروم ہیں۔

ان کا کہنا تھا کہ قاتلوں کے خلاف شدید عوامی احتجاج کے بعد مقدمہ درج کیا گیا لیکن مجرموں کو آج تک سزا نہیں دی گئی اور وہ آزاد گھوم رہے ہیں۔مقررین نے کہا کہ اس قتل عام سے تقریباً ایک ہفتہ قبل 25 جولائی 1998 کو بھارتی فوجیوں نے رات کی تاریکی میں ضلع ڈوڈہ کے علاقے کوتل میں تین خواتین، ایک مرد اور ایک بچے سمیت ایک ہی خاندان کے پانچ افراد کو بے دردی سے شہیدکیاتھا۔حریت رہنماؤں نے کہا کہ شہداء کی عظیم قربانیاں کبھی رائیگاں نہیں جائیں گی اور کشمیری بھارتی تسلط سے ضرور آزادی حاصل کریں گے۔ انہوں نے عالمی برادری سے اپیل کی کہ وہ مقبوضہ جموں و کشمیر میں بھارتی ریاستی دہشت گردی بند کرانے کے لئے اپنا کردار ادا کرے ۔