راولپنڈی ، شہر کو سرسبز اور خوبصورت بنانے کے لیے منصوبہ بندی، ڈپٹی کمشنر کی زیر صدارت اہم اجلاس

جمعہ 7 اگست 2026 14:13

راولپنڈی (اُردو پوائنٹ اخبارتازہ ترین - اے پی پی۔ 07 اگست2026ء) راولپنڈی کو مزید سرسبز، خوبصورت اور جدید شہری سہولیات سے آراستہ کرنے کے حوالے سے ایک اہم اجلاس ڈپٹی کمشنر راولپنڈی کیپٹن (ر) ندیم ناصر کی زیر صدارت ان کے دفتر میں منعقد ہوا۔ اجلاس میں ڈپٹی ڈائریکٹر ڈویلپمنٹ، چیف آفیسر ضلع کونسل، چیف آفیسر میونسپل کارپوریشن، منیجنگ ڈائریکٹر پی ایچ اے اور منیجر آپریشن پنجاب میٹرو بس اتھارٹی سمیت متعلقہ اداروں کے افسران نے شرکت کی۔

اجلاس میں راولپنڈی کے دس میٹرو بس اسٹیشنز، میٹرو روٹ اور پلرز کی خوبصورتی، تزئین و آرائش اور شہری ماحول کو مزید دلکش بنانے کے لیے مختلف تجاویز اور عملی اقدامات کا تفصیلی جائزہ لیا گیا۔ اس موقع پر گرین بیلٹس، پلانٹیشن، جدید شہری ڈیزائن اور تزئین و آرائش کے منصوبوں پر بھی غور کیا گیا۔

(جاری ہے)

ڈپٹی کمشنر کیپٹن (ر) ندیم ناصر نے پی ایچ اے کو ہدایت کی کہ میٹرو اسٹیشنز اور پلرز کے اطراف شجرکاری اور خوبصورت پودوں کی تنصیب کو یقینی بنایا جائے تاکہ شہر کی خوبصورتی میں اضافہ ہو اور شہریوں کو خوشگوار ماحول میسر آئے۔

انہوں نے متعلقہ حکام کو یہ بھی ہدایت کی کہ میٹرو پلرز پر جدید ڈیجیٹل ایڈورٹائزمنٹ اسکرینز کی تنصیب کے لیے قابل عمل منصوبہ تیار کیا جائے تاکہ شہر کی خوبصورتی کے ساتھ ساتھ جدید شہری انفراسٹرکچر کو بھی فروغ دیا جا سکے۔ڈپٹی کمشنر نے کہا کہ راولپنڈی کو صاف، سرسبز اور خوبصورت شہر بنانا ضلعی انتظامیہ کی اولین ترجیحات میں شامل ہے اور تمام متعلقہ ادارے باہمی تعاون سے ایسے منصوبوں پر تیزی سے عملدرآمد یقینی بنائیں جو شہر کے حسن میں اضافہ اور شہریوں کو بہتر ماحول فراہم کرنے میں معاون ثابت ہوں۔\378